Qashaǵan iske qosylǵannan keıin 1,5 aıdyń ishinde kommertsııalyq ónim shyǵara alady - U. Qarabalın

ASTANA. QazAqparat - Qashaǵan iske qosylǵannan keıin 1,5 aıdyń ishinde kommertsııalyq ónim shyǵara alady. Búgin Astanadaǵy «KAZENERGY-2015» H Eýrazııalyq forýmy aıasyndaǵy konferentsııanyń qorytyndysy boıynsha ótken baspasóz máslıhatynda Energetıka mınıstriniń orynbasary Uzaqbaı Qarabalın osylaı málimdedi. Eske salaıyq, forýmnyń munaı-gaz konferentsııasy «Eýrazııa óńirindegi energııa qaýipsizdigi: jańa yntymaqtastyq mehanızmi» taqyrybynda ótken bolatyn.

Vıtse-mınıstr baspasóz máslıhatynda Qashaǵanda munaı óndirý jospar boıynsha 2016 jyldyń sońyna taman bastalady dep kútiletinin atap ótti. Onyń sózine qaraǵanda, búgingi kúni Qashaǵanǵa baılanysty barlyq jumystar osy kezeń ishine josparlanǵan ári ázirshe eshqandaı da ózgerister oryn alǵan emes.

«Mundaı Qashaǵan sekildi aýqymdy da kúrdeli ken orynyn kommertsııalyq óndirýge shyǵarý, barlyq jumystar men qurylǵylar ornyqty bolyp tursa, esh qıyndyq týdyrmaıdy. Bul kúnine 75 myń barrel munaıdy quraıtyn joba, sondyqtan da ondaǵy máseleler aı ishinde shapshań sheshimin taýyp jatyr. Ótken joly da bir jarym aı ishinde biz kúnine sondaı kórsetkishke qol jetkizgen edik. Al endi táýligine 875 myń barrelge kelsek, bunyń bári de qurylǵylardyń qalaı jumys isteıtinine baılanysty bolmaq. Degenmen, bundaı úlken aýqymǵa qoljetkizýge ábden bolady», - deıdi U. Qarabalın.

Onyń aıtýyna qaraǵanda, búgingi kúni qaıta jóndelip, Qashaǵan men "Bolashaqqa" ornatylǵan qurylǵylar joǵaryda atalǵan mejege qol jetkizýge tolyq múmkindik beredi.

Sóz arasynda vıtse-mınıstr aǵymdaǵy jyly elimizde munaı óndirý kólemi 79 mln. tonnaǵa deıin tómendetilgenin atap ótti. Onyń aıtýynsha, munaıǵa álemdik baǵanyń tómendeýi aıasynda bul sonshalyqty kóp emes. «2016 jyly eger jaǵdaı budan da nasharlaı túsetin bolsa, munaı óndirý boıynsha boljam taǵy da 77 mln. tonnaǵa deıin tómendetilýi múmkin. Eger baǵa osy qalypta saqtalyp tursa, onda búgingi boljam da ózgerissiz qalady», - dedi U. Qarabalın.