Qashaǵan daýy boıynsha kelissóz júrgizýdi ınvestorlar usyndy – Ádilet mınıstrligi
ASTANA. KAZINFORM – Ádilet mınıstrligi memlekettik múlik quqyǵyn qorǵaý departamenti dırektorynyń orynbasary Erlan Musabaev Qashaǵan munaı kenishiniń tóńiregindegi quqyqtyq daýdyń barysyna qatysty pikir bildirdi.
«Qashaǵan ken ornyna baılanysty is tóńireginde biz Ekologııa jáne tabıǵı resýrstar mınıstrligine zań turǵysynan kómek kórsetemiz. Ol másele boıynsha ınvestorlar tarapynan memleketke kelissóz júrgizý týraly usynys tústi. Sol kelissózder qazir júrip jatyr. Onyń aǵymdaǵy jaǵdaıyn, ókinishke qaraı, qupııa bolǵandyqtan aıta almaımyz. Biraq nátıjesi boıynsha mindetti túrde baspasóz habarlama taratamyz», - dedi mınıstrlik mamany vedomstvonyń baspasóz máslıhatynda.
Sondaı-aq ol kelissózge neshe zańger, qandaı uıymnyń mamandary tartylǵanyn da aıtýǵa haqysy joq ekenin aıtty.
Eske salsaq, bıyl jazda Qazaqstan tarapy Qashaǵan ken ornyn ıgerýshi alpaýyt kompanııalarǵa qoıǵan talap somasyn 150 mlrd dollardan 160 mlrd dollarǵa deıin ulǵaıtqany belgili bolǵan edi.
