KASE tsıfrlyq aktıvter operatory mártebesin aldy
ASTANA. KAZINFORM – Qazaqstan qor bırjasy (KASE) tsıfrlyq qarjy aktıvteri platformasynyń operatory jáne tsıfrlyq aktıvter saýda platformasynyń operatory retinde resmı tirkeldi, dep habarlaıdy Kazinform.
Ulttyq bank KASE-ni tsıfrlyq platformalar operatorlarynyń tizilimine 001 tirkeý nómirimen engizdi.
Bırjanyń baspasóz qyzmetiniń málimetinshe, KASE osylaısha Qazaqstandaǵy tsıfrlyq aktıvter naryǵynyń retteletin ınfraqurylymynyń bir bóligine aınaldy.
KASE ókilderi tizilimge alǵashqy nómirmen engizilý bırjanyń elimizdegi tsıfrlyq qarjy aktıvteri naryǵynyń negizgi ınfraqurylymdyq elementteriniń biri ekenin kórsetetinin atap ótti.
– Bul dástúrli bırjalyq tájirıbeni jańa tehnologııalyq sheshimdermen ushtastyra otyryp, tsıfrlyq aktıvterdiń ashyq ári qaýipsiz naryǵyn damytýdaǵy mańyzdy qadam, – dedi KASE basqarma tóraǵasy Ádil Muhamedjanov.
Qoldanystaǵy zańnamaǵa sáıkes, endi bırja Qazaqstannyń retteletin naryqtyq ınfraqurylymy aıasynda tsıfrlyq qarjy aktıvterin shyǵarý, aınalymǵa engizý jáne saýdalaýdy uıymdastyra alady.
KASE málimetinshe, Ulttyq banktiń tıisti tizilimderdi júrgizýi naryq qurylymynyń ashyqtyǵyn qamtamasyz etip, retteletin tsıfrlyq ınfraqurylym qatysýshylaryn resmı túrde bekitedi.
Aıta keteıik, buǵan deıin Ulttyq bank tsıfrlyq aktıv operatorlaryn lıtsenzııalaý tártibin bekitkeni habarlanǵan bolatyn.
