KASE tóraıymy Alına Aldambergen óz laýazymyn bosatty

ALMATY. KAZINFORM — 28 naýryzdan bastap KASE basqarma tóraıymy Alına Aldambergenniń ókilettigi onyń óz bastamasy boıynsha merziminen buryn toqtatyldy.

Bul týraly KASE baspasóz qyzmeti habarlady. Qazaqstan qor bırjasy 9 jyl ishinde Alına Aldambergen KASE-ni damytýda mańyzdy ról atqarǵanyn aıtyp, oǵan alǵys bildirdi.

— Bırjany basqarǵan toǵyz jyl ishinde Alına Aldambergen bırjanyń aýqymdy tehnologııalyq transformatsııasyn, halyqaralyq arenadaǵy pozıtsııasyn nyǵaıtýdy jáne jańa qarjy quraldaryn engizýdi qamtamasyz ete otyryp, KASE-ni damytýda mańyzdy ról atqardy. Onyń strategııalyq paıymdaýynyń arqasynda KASE álemdik standarttarǵa sáıkes keletin joǵary tehnologııalyq saýda-sattyq platformasyna aınaldy, — dep habarlady KASE.

Alına Aldambergenniń basshylyǵymen KASE-niń bırjalyq aınalymy 4 eseden astam artqan. Qor naryǵyndaǵy saýda-sattyq kólemi 5 ese, mámile sany 44 ese, aktsııa naryǵyn kapıtaldandyrý kólemi 2,7 ese, al KASE ındeksi 6,5 ese ósken. KASE tobynyń operatsııalyq kirisi 10 ese kóbeıse, komıssııalyq kirisi 6 ese, paıyzdyq kirisi 37 ese artty. KASE tobynyń taza paıdasy 15 ese, menshikti kapıtaly 8 ese kóbeıdi. KASE aktsıonerlerine dıvıdend tóleı bastady. 2024 jyly dıvıdend somasy 9,26 mlrd teńge boldy.

Eske salaıyq, buǵan deıin KASE AIX-pen birigý týraly kelissóz júrgizip jatpaǵanyn jazǵanbyz.