KASE: Teńgeniń dollarǵa qatysty aýytqýynyń sebebi túsindirildi
ALMATY. QazAqparat - Qazaqstan qor bırjasynda (KASE) teńgeniń dollarǵa qatysty aýytqýynyń sebebi nede ekeni túsindirildi, dep habarlaıdy QazAqparat tilshisi.
KASE málimetine sáıkes, 2018 jyldyń 9 aıynda naryqtaǵy sheteldik valıýtalar satylymynyń mólsheri 10,4 trln teńgege jetken. Bul - ótken jyldyń sáıkes kezeńimen salystyrǵanda 16,8 paıyzǵa nemese 1,5 trln teńgege artyq kórsetkish. Jyl basynan beri naryqtaǵy sheteldik valıýtalar satylymyna KASE-tiń jıyny 33 múshesi qatysqan. Satylymnyń ortasha kúndik mólsheri 9 aıdyń ishinde 57 mlrd teńgege teń bolsa, ortasha kúndik kelisimderdiń sany - 329.
Osy jyldyń úshinshi toqsanynda ulttyq valıýta 2016 jyldyń birinshi toqsanynan bergi eń maksımaldy qubylmalylyǵyn kórsetken. USD/KZT jupty kýrstardyń standartty aýytqýy jyl basynan beri aýytqýdyń amplıtýdasynyń ósimi boıynsha: birinshi toqsanda 4 teńgege, ekinshi toqsanda 5,8 teńgege, úshinshi toqsanda 11,1 teńgege (2016 jyldyń birinshi toqsanynda 12,2 teńgege) kóbeıgen. Valıýtalyq naryqtaǵy jaǵdaıdy turaqtandyrý maqsatynda Ulttyq bank 2017 jyldyń qazan aıynan beri tuńǵysh ret valıýtalyq ınterventsııa jasady. Regýlıatordyń habarlamasyna sáıkes, qazan aıynyń 5-7 aralyǵynda sheteldik valıýtalardyń usynysynyń joqtyǵy jaǵdaıynda QR UB 520,6 mln AQSh dollarynyń satylymyn júzege asyrǵan.
«Budan burynǵydaı, ishki naryqtaǵy ósip kele jatqan týrbýlenttiliktiń sebebi syrtqy faktorlardyń yqpalynan bolyp otyr. Onyń ishinde eń kóp áser etkeni - AQSh-tyń sanktsııalyq saıasaty men Federaldyq rezerv júıesiniń monetarlyq saıasaty. Qyrkúıektiń sońynda AQSh-tyń basty qarjylyq regýlıatory federaldyq qorlar boıynsha stavkany 25 bazalyq pýnkt boıynsha kótergen edi. Osy jaǵdaı jyl basynan bergi úshinshi ret kóterýdiń sebebi bolyp otyr. AQSh-tyń qaryz boıynsha 10 jyldyq mindettemesi sońǵy 7 jyldaǵy maksımým mólsherinde saqtalýda. AQSh-tyń tartymdy memlekettik qundy qaǵazdarynyń tabysy kapıtaldyń damyǵan elderge jylystaýyn kúsheıte tústi. Al bul jaǵdaı ulttyq valıýtalarǵa jaqsy áser ete qoıǵan joq. AQSh tarapynan antıreseılik sanktsııalardyń keńeıýi aıasynda rýbldiń dollarǵa qatysty álsireýi ishki kýrstardyń qalyptasýyna úlken áserin tıgizdi", - delingen Qazaqstan qor bırjasynyń baspasóz málimdemesinde.
