KASE Mosbırjadan aktsııalar satyp alýdy josparlap otyr
ASTANA. KAZINFORM – Sheshim halyqaralyq zań konsýltantynyń qatysýymen júrgizilgen taldaý nátıjesinde qazaqstandyq qarjy ınfraqurylymynyń úzdiksiz qyzmetin qamtamasyz etý maqsatynda qabyldandy. Bul týraly Qazaqstan qor bırjasy Kazinform agenttigine bergen resmı jaýabynda habarlady.
«Qazaqstan qor bırjasy» AQ» Máskeý bırjasy MMVB-RTS (MOEX) AQSh, Ulybrıtanııa jáne basqa da elderdiń sanktsııalyq tulǵalarynyń tizimine engizilýi KASE-niń aǵymdaǵy qyzmetine tikeleı áser etpeıtinin jáne KASE-ni osy tizimderge engizý syn-qateri bolmaıtynyn habarlaıdy», - dep tolyqtyrdy KASE.
Olardyń aıtýynsha, 2024 jyldyń 12 maýsymynda MOEX jáne onyń eki enshiles uıymy: Ulttyq klırıngtik ortalyq jáne Ulttyq esep aıyrysý depozıtarııi AQSh Qarjy mınıstrliginiń sheteldik aktıvterdi baqylaý basqarmasy shyǵarǵan 14024 atqarýshy jarlyǵynda qarastyrylǵan sanktsııalar qoldanylǵan.
«Osylaısha, atalǵan tulǵalar 2024 jyldyń 12 maýsymynan bastap SDN tizimine engizildi. SDN tizimine engizý AQSh ıýrısdıktsııasyndaǵy aktıvterdi tolyǵymen buǵattaýdy, sondaı-aq amerıkalyq zańdy jáne jeke tulǵalardyń SDN tiziminde kórsetilgen tulǵalarmen ózara árekettesýine tyıym salýdy bildiredi. Mundaı sanktsııalardy Ulybrıtanııanyń qarjy sanktsııalaryn júzege asyrý basqarmasy (OFSI) 2024 jylǵy 13 maýsymda engizdi», – dep túsindirdi KASE.
Qazaqstan qor bırjasynyń túsindirýinshe, eger sanktsııalyq tulǵalar aktsııalardyń (qatysý úlesteriniń) 50% jáne odan da kóp bóligin ıelense, ıaǵnı mundaı kompanııany baqylaýǵa alsa, kompanııalar sanktsııalyq tizimderge engizý qaterine ushyraıdy. MOEX KASE ornalastyrylǵan aktsııalarynyń jalpy sanynyń 50%-dan azyna (13,1%) ıelik etetindikten, atalǵan sanktsııalar KASE-ge qoldanylmaıdy.
«Máskeý bırjasy 2018 jylǵy 10 qazandaǵy strategııalyq yntymaqtastyq týraly kelisimge sáıkes, KASE strategııalyq seriktesi bolyp sanalady. Sońǵy 5 jylda yntymaqtastyqtyń negizgi maqsattary iske asyryldy», - dep naqtylady uıym.
Bırja qazaqstandyq bırjalyq naryqtyń turaqty jumys isteýin qamtamasyz etý maqsatynda barlyq qajetti sharalardy qabyldaıdy.
