KASE Máskeý bırjasyna tıesili 13% aktsııany qaıtadan ózine satyp alý kerek - sarapshy
ASTANA. KAZINFORM – Qarjy sarapshysy Rasýl Rysmambetov KASE-niń 13% aktsııasyn ustap otyrǵan Máskeý bırjasynyń AQSh sanktsııasyna ilinýi týraly pikir bildirdi.
Eske salaıyq, AQSh qarjy mınıstrliginiń sheteldik aktıvterdi baqylaý jónindegi basqarmasy Qazaqstan qor bırjasynyń 13 paıyz paketin ustap otyrǵan «Moskovskaıa bırja» jarııa aktsıonerlik qoǵamyna sanktsııa salynǵanyn jarııalaǵan edi. KASE bul shekteýdiń qazaqstandyq bırja jumysyna eshqandaı keri áseri bolmaıtynyn málimdedi. Rasýl Rysmambetov te osy paıymmen kelisip otyr.
«Menińshe, ol bizge eshqandaı zııan keltirmeıdi. Sebebi, Qazaqstan qor bırjasyndaǵy MOEX («Moskovskaıa bırja» jarııa aktsıonerlik qoǵamy) ustap otyrǵan aktsııalar – baqylaýshy paket emes, bar bolǵany 13 paıyz ǵana. Biraq bul máseleni báribir AQSh qarjy mınıstrliginiń sheteldik aktıvterdi baqylaý jónindegi basqarmasymen talqylaý kerek. Olarmen jaqsylap sóılesý qajet. MOEX-ke salynǵan sanktsııa jalǵassa, sol 13 paıyzdyq paketti KASE ózine satyp alý kerek. Eń qaýipsiz joly osy dep oılaımyn», - dedi sarapshy.
Qarjyger KASE-ge budan bylaı atalǵan reseılik bırjadan irgesin aýlaǵyraq ustaǵan durys degendi aıtty.
«KASE-niń ózi de MOEX-pen qarym-qatynasty jalǵastyrý máselesin qarastyratynyn aıtypty ǵoı. Osynyń bárin eskersek, eshqandaı baıbalam bolmaý kerek. MOEX degen – tehnologııalyq ınvestor. Sol tehnologııalyq baǵdarlamalary arqyly KASE-den úles satyp alǵan. Qazir eshqandaı táýekel joq. Meniń bilýimshe, OFAC-tan (Office of Foreign Assets Control – AQSh qarjy mınıstrliginiń sheteldik aktıvterdi baqylaý jónindegi basqarmasy) bizge eshqandaı hat kelmegen. Hat kelgen bolsa, alańdaýǵa bolar edi. Biraq báribir de báleden aýlaq bolaıyq desek, 13 paıyz úlesti qaıta ózimizge satyp alǵan jón. Bul máseleniń eń durys sheshimi osy dep oılaımyn», - dep Rasýl Rysmambetov paıymyn taǵy bir naqtylady.
Osyǵan deıin Qazaqstan qor bırjasy ( KASE) AQSh qarjy mınıstrliginiń sheteldik aktıvterdi baqylaý jónindegi basqarmasy jarııalaǵan aqparatqa túsinikteme bergenin jazǵan edik.
Sonda-aq búgin Senattyń jalpy otyrysnda Ulttyq bank basshysy Tımýr Súleımenov te Máskeý bırjasynyń qyzmetin toqtatýy KASE-ge áser ete qoımaıdy degen pikirin bildirdi.
