KASE: Qazaqstandaǵy salyq aptalyǵy teńgeniń nyǵaıýyna yqpal etti
ALMATY. QazAqparat - Qazaqstandaǵy salyq aptalyǵy teńgeniń nyǵaıýyna áser etti, dep habarlaıdy QazAqparat tilshisi.
Onlaın-brıfıng barysynda Qazaqstan qor bırjasynyń (KASE) tóraıymy Alına Aldambergen teńgeniń dollarǵa qatysty qalaı nyǵaıyp jatqanyn aıtty, sondaı-aq ulttyq valıýtanyń bolashaǵyna boljam jasady.
« Jyl basynan beri teńge 10,5% quldyrady. Biraq qazir biz teńgeniń nyǵaıyp jatqanyn kórip otyrmyz. Bul salyq aptalyǵymen baılanysty. Dollarmen qamtamasyz etý artyp keledi. Ulttyq valıýta rýblge qatysty 6,8% nyǵaıdy «, - dedi Alına Aldambergen.
Onyń aıtýynsha, naýryzda teńge baǵasynyń arzandaýy dúnıejúzindegi belgisizdik pen ekonomıkalyq jaǵdaıǵa baılanysty boldy.
« Bul karantın jáne ekonomıkalyq belsendiliktiń tómendeýine baılanysty boldy, qoldaý sharalary qabyldandy. Ulttyq kompanııalar tartyldy, olar tabystyń bóligin valıýta naryǵynda iske asyryp jatyr. Odan ári Ulttyq bank te naýryzdaǵydaı naryqtyń turaqty bolýyna kómektese alady. Ulttyq qordan transfer ulǵaıdy», - deıdi Qazaqstan qor bırjasynyń (KASE) tóraıymy Alına Aldambergen.
Óz kezeginde, KASE taldaý bóliminiń meńgerýshisi Tamara Shadıeva teńgeniń nyǵaıýyna álemdik ekonomıkanyń qalpyna kele bastaýy jáne kóptegen elderdegi karantındik sharalardyń joıylýy áser etkenin atap ótti.
«Sondaı-aq, salyqtyq tólemder túrinde jergilikti qoldaýdyń mańyzdy faktory boldy, óıtkeni bizdiń ulttyq eksporttaýshy kompanııalar 2020 jyldyń birinshi toqsanynda shetel valıýtasyndaǵy túsimderdi salyq tólemderine aıyrbastady. Salyqtardy tóleý 25 mamyrda aıaqtalýy kerek. Valıýtalyq naryqta jaǵdaı turaqty, sondyqtan teńge nyǵaıa bermek»,– deıdi ol.
