KASE-de «rýbl-teńge» saýdasynyń kólemi artty
ALMATY. QazAqparat - Qańtar aıynda Qazaqstan qor bırjasyndaǵy (KASE) sheteldik valıýta naryǵynda rýbl-teńge saýdasynyń kólemi artty. Munyń sebepterin baspasóz máslıhatynda «Qazaqstan qor bırjasy» AQ Aqparat jáne statıstıka departamentiniń dırektory Záýre Esimova túsindirdi, dep habarlaıdy «QazAqparat» HAA tilshisi.
Sheteldik valıýtalar saýdasynyń jalpy kólemi ótken aımen salystyrǵanda 5,1% nemese 60,4 mlrd teńgege artyp, 1 244,8 mlrd teńgeni qurady. Dollar-teńge saýdasy anaǵurlym jıi jasalatynyna qaramastan (qańtarda 7438 mámile, valıýta saýdasynyń jalpy kóleminiń 86,1%), KASE rýbl-teńge saýdasy da aı saıyn ósip kele jatqanyn tirkedi.
Qańtar aıynda rýbl-teńge juby 13,8%-ǵa artyp, atalmysh valıýta saýdanyń jalpy kóleminiń 13,3% qurady. Al 1 rýbldiń ulttyq valıýtaǵa shaqqandaǵy baǵamy 5,69-5,84 teńge aınalasynda boldy.
«Qańtarda rýbl-teńge jubyndaǵy saýda kólemi EAEO aıasyndaǵy jobalar men klıenttik tapsyrystar esebinen azdap artty», - deıdi Záýre Esimova.
Sondaı-aq ıýan-teńge jubyndaǵy saýda kólemi de mınımaldy ósimdi kórsetti. ıÝan-teńge juby boıynsha 47 mámile jasaldy, bul jalpy sheteldik valıýta saýdasynyń 0,6% qurady. Qytaı valıýtasynyń baǵamy 50,2-51,2 teńge tóńireginde aınaldy.
Al eýro-teńge jubyndaǵy saýdalar biraz qysqarǵan. Qańtar aıynda 21 mámile jasalyp, jalpy saýda kóleminiń 0,1% qurady. 1 eýro 395-402 teńge shamasynda boldy.
