KASE-de memlekettik oblıgatsııalar saýdasy 23%-ǵa ósti
ALMATY. KAZINFORM - KASE qor bırjasynda memlekettik baǵaly qaǵazdarmen saýda-sattyq kólemi toǵyz aıda 8,4 trln teńgege jetti. Bul ótken jyldyń sáıkes kezeńimen salystyrǵanda 23%-ǵa kóp.
Qazaqstan qor bırjasynyń málimetinshe, KASE-de aınalymdaǵy memlekettik boryshtyń nomınaldy quny 36,6 trln teńge nemese 83,3 mlrd dollarǵa jetti. Jyl basynan beri bul kórsetkish 14,8%-ǵa, ıaǵnı 4,7 trln teńgege ósti.
Bastapqy naryqta memlekettik baǵaly qaǵazdar saýdasynyń kólemi 16,8%-ǵa artyp, 6,1 trln teńgege jetti. Onyń ishinde Qarjy mınıstrligi jyldyq mólsherlemesi 13,88%-dan 19,18%-ǵa deıingi 28 MEKAM shyǵarylymyn ornalastyrý arqyly 5,6 trln teńge tartty.
Taǵy 576,2 mlrd teńgeni memlekettik baǵdarlamalardy iske asyrý aıasyndaǵy is-sharalardy qarjylandyrý úshin 17 oblystyń, Astana men Shymkenttiń ákimdikteri tartty. Úshinshi toqsanda memlekettik baǵaly qaǵazdardy ornalastyrý kólemi 2,6 trln teńge boldy. Bul aldyńǵy toqsanmen salystyrǵanda 39,2%-ǵa kóp.
Ekinshi naryqtaǵy belsendilik te aıtarlyqtaı artty. Toǵyz aıda saýda-sattyq kólemi 44,3%-ǵa ósip, 2,2 trln teńgege jetti. Onyń ishinde MEKAM úlesi 74,7% nemese 1,6 trln teńge boldy. Ulttyq banktiń notalary 15,3% nemese 337,8 mlrd teńgeni qurady. Qazaqstannyń eýrooblıgatsııalaryna saýda aınalymynyń 5,2%-y nemese 115,9 mlrd teńgesi tıesili boldy.
Ekinshi naryqtaǵy memlekettik baǵaly qaǵazdar aınalymynyń 20,9%-yn rezıdent emes ınvestorlar qamtamasyz etti. Investorlardyń negizgi sanattary arasynda eń úlken úles bankterge tıesili boldy — 48,3%. Ózge zańdy tulǵalardyń úlesi 29,2%, basqa ınstıtýtsıonaldyq ınvestorlardyń úlesi 18%, brokerlik-dılerlik uıymdardyń úlesi 3,2%, al jeke tulǵalardyń úlesi 1,3% boldy.
Buǵan deıin Qazaqstannyń memlekettik oblıgatsııalary J.P. Morgan damýshy naryqtar ındeksine engizilýi múmkin ekeni habarlandy.
