KASE búgingi saýdanyń ashylý rásimin áıelder merekesine arnady
ALMATY. QazAqparat - KASE qor bırjasy búgingi saýdanyń ashylý rásimin BUU «Ring the Bell for Gender Equality» bastamasyna sáıkes áıelder merekesine arnady, dep habarlaıdy QazAqparat tilshisi.
«Tańerteń saýda ashyldy. Búgin 792 qarjy quraly qoıyldy. Qundy qaǵazdar týraly aıtatyn bolsaq, 126 aktsııa, 110 emıtent qoıyldy. Biz BUU men álemdik bırjalardyń bastamasyna qosylyp, saýdanyń ashylýyn áıelderge arnap jatyrmyz. Nıý-Iork qor bırjasy jaqynda sondaı shara ótkizdi. Bir aıtatynym, bırjada erlerden góri áıelder kóp jumys jasaıdy. Qor bırjasynda operatsııalyq jumystar basym bolǵandyqtan, ondaı jumysty áıelder jaqsyraq tyndyrady», - dedi KASE qor bırjasy basqarma tórǵasynyń orynbasary Andreı Tsalıýk.
Sonymen qatar ol KASE qor naryǵynda 78 áıel men 53 er adam jumys jasaıtynyn jetkizdi.
Qazir Qazaqstan qor bırjasyn da Alına Aldambergen basqaryp otyr.
«Genderlik saıasat boıynsha Qazaqstan álemde 93-orynda tur. Bizdiń elde Memlekettik hatshy men Eńbek jáne áleýmettik qorǵaý mınıstri - áıel. Qalǵan 19 Úkimet múshesi er adam ekenin eskersek, bul óte az kórsetkish. Alına Aldambergen - Azııa aımaǵynda qor bırjasyn basqaratyn úsh áıeldiń biri. Bul óte jaqsy jetistik. Áıelderdiń tabandylyǵy men er adamdardyń jaqsy qasıetteri úndestikte bolǵany óte oryndy», - dedi Qazaqstandyq isker áıelder uıymynyń jetekshisi Raýshan Sársembaeva.
