KASE basqarma tóraǵasynyń orynbasary taǵaıyndaldy

ASTANA. KAZINFORM — KASE basqarma tóraǵasynyń orynbasary bolyp Aınagúl Ysqaqova saılandy, dep habarlaıdy qor bırjasynyń baspasóz qyzmeti.

— Qazaqstan qor bırjasynyń (KASE) dırektorlar keńesiniń sheshimimen 2025 jyldyń 23 maýsymynan bastap KASE basqarma tóraǵasynyń orynbasary bolyp Aınagúl Qýanyshbaıqyzy Ysqaqova (ókilettik merzimi 2026 jyldyń 1 shildesine deıin) saılandy, — delingen habarlamada.

Aınagúl Ysqaqova Qazaqstan Respýblıkasynyń qarjy sektorynda 18 jyl jumys ótili bar, 2018 jyldan 2022 jylǵa deıin KASE-de Strategııa jáne halyqaralyq yntymaqtastyq bólimshesin basqardy. Jaqynda «Baǵaly qaǵazdardyń ortalyq depozıtarııi» AQ basqarýshy dırektory, basqarma múshesi boldy, onda onyń basshylyǵymen Agile ádisnamasy boıynsha ónimdi ázirleý praktıkasy engizildi. Qarjylyq taldaý, strategııalyq josparlaý, jobalyq basqarý jáne halyqaralyq qatynastar salasynda tájirıbesi bar.

KASE Dırektorlar keńesi 2025 jyldyń 20 maýsymynan bastap Ermek Bolatuly Májikenovtiń KASE Basqarma tóraǵasynyń orynbasary retindegi ókilettigin merziminen buryn toqtatý týraly sheshim qabyldady.

Osy sheshimderdi eskere otyryp KASE basqarmasy bes adamnan turady:

Muhamedjanov A.N., basqarma tóraǵasy;

Amanjolova D. M., basqarma tóraǵasynyń orynbasary;

Grıshko M.V., basqarma tóraǵasynyń orynbasary;

Ysqaqova A.K., basqarma tóraǵasynyń orynbasary;

Sarjaqov J.N., bsqarma tóraǵasynyń orynbasary.

Buǵan deıin Kazakh Tourism-da basshylyq aýysqany týraly jazǵanbyz.