Kásibı merekede ulytaýlyq BAQ qyzmetkerleri baspanaly boldy
JEZQAZǴAN. KAZINFORM — Ulytaý oblysynda Buqaralyq aqparat quraldary qyzmetkerleri kúnine arnalǵan saltanatty is-shara ótip, aqparat salasynyń úzdik ókilderi marapattaldy.
Dástúrli merekelik jıynda Ulytaý oblysy ákiminiń arnaıy «Ular» syılyǵy tabystalyp, óńir jýrnalısteriniń eńbegi joǵary baǵalandy. Sonymen qatar, Memleket basshysynyń tapsyrmasyna sáıkes, oblystyń eki jýrnalısine eki bólmeli páterdiń kiltteri tapsyryldy. Ulytaý oblysynyń ákimi Dastan Adaıuly Ryspekov «Habar» telearnasynyń oblystaǵy menshikti tilshisi Eldos Kákenov pen «Aımaq aqshamy» gazetiniń aǵa tilshisi Meıramkúl Alpysbaevaǵa páter kiltterin saltanatty jaǵdaıda tabystady.
Saltanatty jıynǵa qatysqan Ulytaý oblysynyń ákimi jýrnalısterdi kásibı merekelerimen quttyqtap, qoǵam men memleket arasyndaǵy altyn kópirge aınalǵan aqparat salasy ókilderiniń óńirdiń damýy men el birligin nyǵaıtýdaǵy erekshe eńbegin atap ótti. Óńir basshysy buqaralyq aqparat quraldary qyzmetkerlerine shynaıy alǵysyn bildirip, jaýapty qyzmetterine tabys tiledi.
Mereke aıasynda sala ardagerleri men úzdik mamandarǵa memlekettik jáne vedomstvolyq nagradalar tabystaldy. Atap aıtqanda, «Eren eńbegi úshin» jáne «Eńbek ardageri» medaldary, «Aqparat salasynyń úzdigi», «Qazaqstannyń qurmetti jýrnalısi» tósbelgileri, Qazaqstan Respýblıkasy Mádenıet jáne aqparat mınıstriniń Qurmet gramotalary men Alǵyshattary tapsyryldy. Sondaı-aq birqatar jýrnalıster men medıa salasynyń qyzmetkerleri Ulytaý oblysynyń Qurmet gramotasymen jáne oblys ákiminiń Alǵyshatymen marapattaldy.
Keshtiń basty oqıǵalarynyń biri — Ulytaý oblysy ákiminiń «Ular» syılyǵynyń jeńimpazdaryn marapattaý rásimi boldy. Bıyl syılyqtyń 13 nomınatsııasy boıynsha úzdik atanǵan jýrnalısterge 500 myń teńgeden 1 mıllıon teńgege deıingi aqshalaı syıaqylar tabystaldy.
Merekelik is-shara óńir jýrnalısteriniń qoǵamdaǵy mańyzdy mıssııasyna qurmet kórsetip, olardyń kásibı eńbegin laıyqty baǵalaýdyń jarqyn kórinisine aınaldy.
