Kásibı merekede qyzylordalyq BAQ qyzmetkerleri baspanaly boldy
QYZYLORDA. KAZINFORM — Búgin «Óner ortalyǵynda» 28 maýsym – Buqaralyq aqparat quraldary qyzmetkerleri kúnine arnalǵan «Qanatty qalam – 2026» saltanatty sharasy ótti.
Oǵan oblys ákimi Murat Ergeshbaev, oblystyq máslıhat tóraǵasy Murat Tleýmbetov, zııaly qaýym ókilderi men sala ardagerleri qatysty.
Aımaq basshysy jýrnalısterdi kásibı merekemen quttyqtap, óńirdegi bastamalar men jańashyldyqtardy halyqqa shynaıy jetkizýdegi eńbekterin joǵary baǵalady.
— Búgin — merzimdi basylymdar men telearnalarda, aqparattyq agenttikter men saıttarda qyzmet isteıtin shyǵarmashylyq ókilderiniń, jýrnalıst jasaǵan sıýjet pen jazǵan maqalanyń jaryqqa shyǵýyna eńbek sińiretin mamandardyń mereıli kúni.
Mereke qarsańynda Prezıdentimiz Qasym-Jomart Kemeluly buqaralyq aqparat quraldary ókilderin Aqorda tórinde qabyldap, memlekettik nagradalar tabystady.
«Qyzylorda» telearnasynyń ardageri Qarabala Jaǵyppar Amanjoluly «Parasat» ordenimen nagradtaldy. Bul — Syr jýrnalıstıkasyna berilgen joǵary baǵa.
Memleket basshysy: «Jýrnalıster qaýymy — eń aldymen qoǵamnyń jarshysy ári shynaıy janashyry. Sizder árdaıym halyqtyń kókeıinde júrgen ózekti máselelerdi kóterip, jurt múddesine adal qyzmet etip kelesizder. Memleket sizderdiń eren eńbekterińizdi joǵary baǵalaıdy» dep erekshe atap ótti.
Ulttyq jýrnalıstıka tarıhynda Syr óńiriniń aıryqsha orny bar. Ǵasyrlyq belesine jaqyndaǵan basylymdar men táýelsizdik jyldarynda shyqqan gazetter — aımaqtyń syr-shejire sandyǵy. Oblystyń tarıhy, áleýmettik-ekonomıkalyq damýy men mádenı-rýhanı jańǵyrýynyń aıqyn derekkózi.
Bıyl aımaǵymyzdyń jetekshi arnasy — «Qyzylorda» telearnasy 35 jyldyq mereıtoıyn atap ótti. Telearna óńirimizdegi oqıǵalar men aqparattardy jyldam taratyp, el ómirindegi saıası mańyzdy jańalyqtardyń jarshysy bolyp keledi.
Otyz jylǵa jýyq kórermen kózaıymyna aınalǵan «Qoǵam TV» telearnasynyń da aqparattyq saıasattaǵy orny erekshe. Aımaq televızııasynyń búgingi bıigi — ótken men búgindi jalǵaǵan ardagerler eńbeginiń jemisi. Aqparat aıdynynda óz qoltańbasyn qaldyrǵan maıtalman mamandardyń tabandylyǵy men qajyrly eńbegi telejýrnalıstıka tarıhynda laıyqty izin qaldyrdy.
Búginde taǵylymdy joldan ótip, ustazdarynyń ónegesin jalǵaǵan mamandar elimizge belgili iri medıaholdıngterde, telearnalarda eńbek etip, Syr jýrnalıstıkasy mektebiniń mereıin ústem etýde.
Táýelsizdik shejiresin, Syr óńiriniń jylnamasyn, qalyptastyrýdaǵy qajyrly eńbekterińiz úshin Sizderge alǵysymdy bildiremin!», — dedi Murat Nálqojauly.
Keshe Aqorda tórinde ótken rásimde Memleket basshysy jýrnalısterdi qoldaýǵa, áleýmettik jaǵdaıyn jaqsartýǵa basa mán beriletinin aıtqan edi. Keıingi úsh jylda Astana qalasynda ǵana 200 jýrnalıst baspanaly bolsa, endi bul bastamanyń aýqymy keńeıdi. Prezıdent tapsyrmasymen bıyl alǵash ret oblystarda jumys isteıtin aqparat salasynyń 66 qyzmetkerine páter kilti berildi.
Bizdiń aımaqta «Syr medıa» seriktestigi dırektorynyń orynbasary Ázız Batyrbekovke jáne «Qyzylorda» telearnasynyń teleoperatory Ramazan Júsipbekke páter kiltteri tabystaldy.
Saltanatty rásimde aqparat salasynyń damýyna eleýli úles qosqan qalam ıeleri «Parasat», «Qurmet» ordenderimen, «Eren eńbegi úshin» medalimen, QR Mádenıet jáne aqparat mınıstrliginiń «Eńbek ardageri», «Aqparat salasynyń úzdigi» tósbelgilerimen, Qurmet gramotasymen, Qazaqstan Jýrnalıster odaǵynyń «Qazaqstannyń Qurmetti jýrnalısi» ataǵymen, QR Premer-mınıstriniń birinshi orynbasarynyń, Premer-mınıstriniń orynbasary — Mádenıet jáne aqparat mınıstriniń, oblys ákiminiń Alǵys hattarymen, Qurmet gramotasymen jáne túrli nomınatsııalarmen marapattaldy.
