Kásibı mereke: Jaýyngerlik daıarlyq mamanynyń kásibı kúni engizildi
ASTANA. KAZINFORM – Qorǵanys mınıstriniń buıryǵymen QR Qarýly kúshteriniń kásibı merekeleriniń tizbesine jaýyngerlik daıarlyq mamany kúni engizildi. Ol 14 tamyzda atap ótiledi. Bul týraly Qorǵanys mınıstrliginiń baspasóz qyzmeti jazdy.
«Armııanyń jaýyngerlik áleýetin nyǵaıtý isindegi osy qyzmet baǵytynyń mańyzdylyǵyn eskere otyryp, 1992 jylǵy 14 tamyzda Qorǵanys mınıstriniń jaýyngerlik daıarlyq jónindegi orynbasary — QR Qorǵanys mınıstrligi jaýyngerlik daıarlyq basqarmasynyń bastyǵy laýazymy bekitildi. Oǵan general-maıor ıÝrıı Qurmatov taǵaıyndalǵan bolatyn» – delingen habarlamada.
Jaýyngerlik daıarlyq úderisin ortalyqtandyryp basqarý — áskerlerdiń jaýyngerlik joǵary deńgeıde mashyqtanýdyń jáne olardyń jaýyngerlik ázirligin arttyrýdyń mindetti erejesi.
Qarýly kúshterdegi jaýyngerlik daıarlyq organdarynyń komandırleri men mamandarynyń kúndelikti qajyrly eńbeginiń arqasynda oqý protsesteri únemi jetildirilip otyrady, ótkiziletin is-sharalardyń qarqyndylyǵy men aýqymy artyp keledi. Olardyń barlyǵy áskerlerdi urysqa qajet nársege úıretý qaǵıdatyna baǵynady.
