Kásibı qutqarýshy boldy: Sýǵa batyp bara jatqan balany qutqarǵan jigittiń oqıǵasy
ALMATY. KAZINFORM — 25 jastaǵy Álıhan Jaqsylyqtyń ómiri batyl áreketinen keıin kúrt ózgerdi. Bıyl kúzde ol Esentaı ózenine qulap ketken balany qutqaryp qaldy. Osydan keıin Álıhan Almaty qalalyq qutqarý qyzmetine jumysqa shaqyryldy.
Álıhan Jaqsylyq – salt pen dástúrdi, izgilik pen adamgershilikti joǵary baǵalaıtyn qarapaıym qazaq otbasynda dúnıege kelgen. Álıhan úıdiń ekinshi balasy. Úlken ápkesi turmysta. Ol ata-anasymen jáne ájesimen turady.
— Ájem 68 jasta, uzaq jyl jol serik bolyp jumys istegen, qazir zeınette. Ákem de jol serik boldy, qazir densaýlyǵyna baılanysty zeınetke shyqty. Anam dárihanada farmatsevt bolyp jumys isteıdi, al ápkem feldsher mamandyǵyn tańdady,— deıdi ol.
Álıhan Jaqsylyq Qyzylorda oblysynyń «Bolashaq» ýnıversıtetin «Dene shynyqtyrý jáne sport» mamandyǵy boıynsha 2020 jyly bitirgen.
Onyń ómirin ózgertken oqıǵa osy jyldyń 27 qazanynda boldy. Qyzylorda qalasynan jalǵa alatyn páter izdep kelgen Álıhan saǵat 14:00 shamasynda Esentaı ózeni Maqataev kóshesiniń qıylysyndaǵy jaǵalaýynda balalardyń kómek surap aıqaılaǵanyn estigen. Bala Esentaı ózeniniń kaskadynda turyp, sýǵa qulap, ony qatty aǵyn alyp ketken eken. Qas qaǵym sátte ómirine qaýip tóngenine qaramastan, Á.Jaqsylyq dereý temir qorshaýdan sekirip, sýǵa batyp bara jatqan balany qutqaryp qaldy.
— Men ne bolǵanyn sýdan shyqqannan keıin ǵana túsindim. Men aıaq kıimmen sýǵa sekirýge bolmaıtynyn estigen edim, sondyqtan men ózenge júgirip bara jatqanda, aıaq kıimimdi sheship aldym. Aqsha, telefon jáne qujattar salynǵan sómkeni jaǵaǵa qoıyp ketýge ýaqyt bolmady - ár sekýnd mańyzdy edi. Bári sý boldy jeke kýáligim aǵyp ketti. Bir ǵajaıyp boldy sómkemdegi shaǵyn Quran kitapshasy qup-qurǵaq shyqty, – deıdi Álıhan Jaqsylyq.
Álıhan qutqarǵan bala, qorqyp qashyp ketedi. Keıin onyń ózenge jaqyn jerde turatyny belgili boldy.
Álıhannyń jankeshti árketin jaqyn mańnan ótip bara jatqan kýáger vıdeoǵa túsirip alyp, áleýmettik jelide taratyp jibergen.
— Eki kúnnen keıin balanyń ákesi maǵan telefon soǵyp, alǵys aıtyp, qarjylaı kómek kórsetkisi keletinin jetkizdi. Biraq men bas tarttym, óıtkeni men muny aqsha úshin jasaǵan joqpyn, — dep bólisti Álıhan.
Keıin polıtsııa ókilderi habarlasqan. Álıhan olarǵa bolǵan jaǵdaıdy egjeı-tegjeıli aıtyp berdi.
Óz kezeginde tótenshelikter jas qutqarýshyǵa qurmet kórsetti. Tótenshe jaǵdaılar mınıstriniń atynan Almaty qalasy TJD bastyǵy Nurlan Atyǵaev Álıhan Jaqsylyqqa «Sýǵa batqandy qutqarǵany úshin» medalin saltanatty túrde tabys etti.
Bul oqıǵa Álıhan úshin jańa kezeńniń bastaýy boldy. Oǵan ákimdikke qarasty Almaty qalalyq qutqarý qyzmetine (109) jumysqa ornalasý týraly usynys tústi. Álıhannyń atalǵan qyzmette júrgenine bir aıǵa jýyqtady. Ol taǵylymdamadan ótý barysynda kóptegen shaqyrtýǵa shyqty. Qutqarýshylardyń jumysy ártúrli mindetterdi qamtıdy: páterde qamalyp qalǵan adamdarǵa kómektesýden bastap, taýda adasyp ketkenderdi izdeýge deıin.
Sońǵy shaqyrtýdyń birinde ol tósekten qulap qalǵan qart adamǵa kómektesti.
— Biz tereze arqyly úshinshi qabatqa kóterilip, esikti ashyp, jedel járdem shaqyrdyq. Kún saıyn túrli jaǵdaı bolady. Maǵan jumysym, adamdardy qutqarý unaıdy, — deıdi Álıhan.
Sondaı-aq ol ujymda árqashan kómekke, qoldaýǵa daıyn meıirimdi jáne janashyr adamdar jumys isteıtinin aıtty.
Qazir Álıhan Almatyda jaldamaly páterde turady. Insýlttan keıin aıaq- qoly qozǵalmaı qalǵan ákesin emdetip jatyr.
— Men ata-anamdy Almatyǵa kóshirip alǵym keledi, biraq olardyń Qyzylordadan ketkisi joq, — deıdi jas jigit.
Álıhannyń ómiri optımızmge toly. Onyń armandary men maqsattary bar, ol kóp saıahattap, álemdi kórgisi keledi.
Endigi maqsattarymnyń biri – kásibı qutqarýshy bolý. Bul jumysta únemi jańa nárselerdi úırenip, sheberligin shyńdaıtynyn aıtady.
Aıta keteıik, osydan jeti jyl buryn Álıhan Syrdarııada sýǵa batyp bara jatqan qyzdy aman alyp qalǵan.
Jaqynda «Jibek joly» telearnasy kórermen kózaıymyna aınalǵan «Jaqsy adamdarym» baǵdarlamasyn qorytyndylap, el ishinde erligimen, erekshe qaısarlyǵymen tanylǵan búgingi kúnniń batyrlaryn marapattady. Olardyń qatarynda Álıhan Jaqsylyqta bar.
Osyǵan deıin jetim qalǵan egiz jasóspirimdi baýyryna basqan almatylyq erli-zaıypty Baqytjan men Arzygúl týraly jazǵan edik.
Aıta keteıik, erekshe aktsııa uıymdastyrǵan almatylyq kásipker Mahatdın Hadjıev ta 12 jeltoqsan kúni Astanadaǵy Beıbitshilik jáne kelisim saraıynda «Jaqsy adam-2024» arnaıy syılyǵymen marapataldy.