Kásibı qupııaǵa jatatyn derekterdiń tizbesin Konstıtýtsııa arqyly naqtylaý usynyldy
ASTANA. KAZINFORM — Májilis depýtaty Marat Báshimov Konstıtýtsııalyq reforma jónindegi komıssııanyń úshinshi otyrysynda jeke derekterdi qorǵaý múmkindikterin Konstıtýtsııa arqyly jetildirýdi usyndy.
— «Qupııa» deıtin konstıtýtsııalyq termın birinshi kezekte adamnyń jeke aqparatyn onyń erkine qaıshy kele otyryp zańsyz, negizsiz ıemdenýge jol joq ekenin bildiredi. Jeke qupııaǵa kez kelgen azamattyń ıntımdik-emotsıonaldyq baılanysy, jeke sımpatııasy men antıpatııasy, densaýlyq jaǵdaıy týraly málimetter kire alady. Jeke derekter týraly zańnyń 11-babynda qazirdiń ózinde qoljetimdiligi shektelgen jeke derekterge qol jetkize alatyn operatorlardyń menshik ıeleri men úshinshi tulǵalar ol derekterdiń qupııalyǵyn derek ıesiniń nemese zańdy ókiliniń kelisiminsiz taralýyna jol bermeý talaptaryn saqtaý arqyly saqtaý kerektigi bekitilgen, — dedi ol.
Zańger qyzmet baby boıynsha jáne eńbek qatynastaryna baılanysty qoljetimdiligi shekteýli derekter týraly málimet alǵan tulǵalar ol derekterdiń qupııalyǵyn qamtamasyz etýge mindetti ekenin Ata zańmen bekitý kerek dep otyr.
— Qylmystyq kodekstiń 148-baptyń 1-bóligi boıynsha qupııany zańsyz buzý eki jylǵa deıin bas bostandyǵynan aıyrý úkimimen jazalanatyny aıtylǵan. Birqatar mamandyq ókiline senip tapsyrylatyn jeke otbasy derekterin azamattardyń quqyqtary men múddelerin qorǵaý úshin «kásibı qupııa» dep bekitý qajet. Olarǵa dáriger qupııasy, advokat qupııasy, moıyndaý qupııasy, aldyn ala tergeý qupııasy, notarıaldyq áreketter qupııasy sııaqty derekter jatady. Sondyqtan QR Konstıtýtsııasynyń jeke bostandyqqa quqyq mazmunyna ár adamnyń jeke derekterdi zańsyz jınaýdan, saqtaýdan, óńdeýden, paıdalanýdan onyń ishinde tsıfrlyq tehnologııalardy qoldana otyryp ta paıdalanýdan táýelsizdik beretin quqyqtyq ókilet engizý kerek, — dedi Marat Báshimov.
Aıta ketý kerek, Konstıtýtsııalyq komıssııa otyrystarynda usynylyp jatqan bastamalar men normalardyń qaısysy qabyldanyp, qaısysy Ata zańǵa enbeıtinin referendým sheshedi.
Kazinform agenttiginiń qazaq jáne orys tilindegi Telegram arnasynda mátin translıatsııasy bolady.
Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.