Kásibı adaldyq pen turaqtylyq sımvoly: Qarmet energetıkteri qurmetke bólendi
QARAǴANDY. KAZINFORM — Energetıka — óndiris pen óńirlik ekonomıkanyń úzdiksiz jumysyn qamtamasyz etetin strategııalyq sala. Energetıkter kúni qarsańynda osy jaýapty baǵytta jyllfh boıy tabandy eńbek etken Qarmet kompanııasynyń mamandary memlekettik jáne óńirlik nagradalarmen marapattaldy.
Energetıkter kúni kásibı merekesi qarsańynda Qarmet kompanııasynyń birqatar qyzmetkerleri elimizdiń energetıka salasyn damytýǵa jáne óndiristik ınfraqurylymnyń turaqty jumysyn qamtamasyz etýge qosqan eleýli úlesi úshin joǵary marapattarǵa ıe boldy. Memlekettik jáne óńirlik deńgeıde kórsetilgen bul qurmet sala mamandarynyń kúndelikti, kóbine kózge kórine bermeıtin eńbeginiń mańyzyn aıqyndaı tústi.
Marapattalǵandardyń qatarynda Qarmet kompanııasyna qarasty «Energoýgol» óndiristik basqarmasynyń elektr jabdyqtaryn jóndeý jáne qyzmet kórsetý jónindegi elektrmonteri Qanat Jylqashınov bar. Ol otandyq energetıkanyń damýyna qosqan zor úlesi úshin «Eren eńbegi úshin» memlekettik medalimen marapattaldy. Joǵary nagradany Memleket basshysynyń atynan Qazaqstan Respýblıkasynyń Energetıka mınıstri Erlan Aqkenjenov saltanatty túrde tabystady.
Qanat Sabethanuly — energetıka salasynda 40 jyldan astam ýaqyt úzdiksiz eńbek etip kele jatqan tájirıbeli maman. Uzaq jyldar boıy ol jaýapkershiligimen, tereń tehnıkalyq bilimimen jáne kásibine degen adaldyǵymen erekshelenip, áriptesteri arasynda abyroı-bedelge ıe boldy. Onyń eńbegi kómir óndirý kásiporyndaryndaǵy energetıkalyq júıelerdiń qaýipsiz ári úzdiksiz jumys isteýine tikeleı yqpal etip keledi.
— Men energetıka salasynda 40 jyldan astam ýaqyt eńbek etip kelemin. Qazirgi tańda Qarmet kompanııasynda aýqymdy jańǵyrtý jumystary júrgizilip jatyr. Shahtalarda pozıtsııalaý júıesi iske qosylyp, úlken kólemdegi jumystar atqaryldy. Sonymen qatar, kómir óndirý nysandarynyń búkil energetıkalyq bóligin turaqty túrde baqylap, qyzmet kórsetip otyramyz. Memlekettiń eńbegimizdi eskerip, marapattaýy — biz úshin zor mártebe, — dedi Qanat Jylqashınov.
Osy kúni Qaraǵandy oblysy ákimdiginde ótken saltanatty jıynda Qarmet kompanııasynyń Bas energetık bólimi qyzmetkeri Vıacheslav Barashkınge Qaraǵandy oblysynyń Qurmet gramotasy tabystaldy. Bul marapat adal eńbegi, joǵary kásibı biliktiligi jáne óńirdiń energetıka sektorynyń senimdi ári úzdiksiz jumysyn qamtamasyz etýge qosqan súbeli úlesi úshin berildi.
Vıacheslav Barashkınniń aıtýynsha, bıylǵy jyl Qarmet tarıhyndaǵy mańyzdy kezeńderdiń birimen este qaldy. Kompanııada birneshe býyn energetıkteri men metallýrgteri kópten beri armandaǵan iri joba júzege asyryldy.
— Kásibı merekemiz — Energetıkter kúni qarsańynda óńirdiń áleýmettik-ekonomıkalyq damýyna qosqan jeke eńbek úlesim úshin Qaraǵandy oblysynyń Qurmet gramotasyn alý men úshin úlken abyroı. Bıyl biz áriptesterimizben birge energetıkter men metallýrgterdiń birneshe býyny ańsaǵan isti júzege asyryp, kásiporynda tabıǵı gazdy paıdalaný múmkindigin qamtamasyz ettik. Qazirgi ýaqytta kombınatty gazdandyrýdyń birinshi kezeńi tolyq aıaqtaldy, alda ekinshi jáne úshinshi kezeńder tur. Qarmet úshin strategııalyq mańyzy zor bul iske óz úlesimdi qosqanyma maqtanamyn, — dedi ol.
Qarmet kompanııasynda energetıkterdiń eńbegi óndiristiń turaqtylyǵy men qaýipsizdigin qamtamasyz etetin negizgi faktorlardyń biri retinde baǵalanady. Kompanııa basshylyǵy sala mamandarynyń kásibıligi men jaýapkershiligi iri óndiristik jobalardy tabysty iske asyrýǵa múmkindik berip otyrǵanyn atap ótedi.
Qarmet kompanııasy barsha energetık áriptesterin laıyqty marapattarymen jáne kásibı merekesimen quttyqtaı otyryp, olarǵa myqty densaýlyq, tolaǵaı tabys jáne jańa kásibı jetistikter tileıdi.