Qas-qaǵym sátte jarylýy múmkin: Gaz ballondaryn qalaı qaýipsiz paıdalaný kerek

Shyǵys Qazaqstan oblysynyń qutqarýshylary gaz ballondaryn qalaı qaýipsiz paıdalaný kerektigin túsindirdi, dep habarlaıdy QazAqparat tilshisi.

Gaz ballondaryn únemi paıdalanatyn azamattardyń kóbi qarapaıym qaýipsizdik erejelerin saqtaı bermeıdi. Sonyń saldarynan jyl saıyn jarylystar men tótenshe jaǵdaılar bolyp jatady. Sebebi gaz ballondary óte qaýipti, qas-qaǵym sátte jarylýy múmkin.

Halyq arasynda eski, tozǵan jáne qajetti kýálandyrýdan ótpegen gaz ballondaryn paıdalanatyndar az emes. Ballondy gazǵa toltyrý úshin turǵyndar arnaıy jabdyqtary joq gaz quıý stantsııalaryna da baryp jatady.

Osy rette, ShQO TJD qyzmetkerleri gaz ballondaryn qalaı qaýipsiz paıdalaný kerektigin eske saldy:

- Páterlerde, jer úılerde, jertólelerde suıytylǵan gaz quıylǵan ballondardy saqtaýǵa bolmaıdy. Qosalqy, toltyrylǵan jáne bos ballondardy ǵımarattardyń syrtynda arnaıy shkaftarda nemese qosalqy úı-jaılarda saqtaý qajet. Ballondy sýyqtan jyly jerge ákelýge, ony jylý kózderiniń janyna qoıýǵa qatań tyıym salynǵan. Sonyń saldarynan jarylys bolýy múmkin.

- Gaz ballondaryn 2 qabattan aspaıtyn ǵımarattarda ornalastyrýǵa ruqsat etiledi. Mindetti túrde ballon ruqsat etilgen qysymnan asqan kezde iske qosylatyn aǵyzý klapanymen jabdyqtalýy tıis.

- Ballondarǵa gazdy ólsheýdiń normatıvtik dáldigin qamtamasyz etetin salmaq qondyrǵysymen jabdyqtalǵan mamandandyrylǵan pýnktterde ǵana quıý kerek. Tsılındrdi aýystyrý gaz mamandarynyń qatysýymen ǵana júzege asyrylady.

- Tsılındrdi gaz plıtasyna qosý úshin uzyndyǵy bir metrden aspaıtyn arnaıy shlangty paıdalanyńyz. Onyń sozylýyna nemese qysylýyna jol bermeńiz.

- Gazdy qosý retin qadaǵalańyz: aldymen sirińkeni jaǵyp, sodan keıin gazdy ashyńyz.

- Úı-jaıda gazdyń ıisi paıda bolǵan kezde gaz berý kranyn jaýyp, úı-jaıdy jeldetý úshin terezeler men esikterdi dereý ashyńyz. Ashyq otty paıdalanýǵa, elektr qýatyn qosýǵa bolmaıdy.