Qarjynyń joqtyǵy Pavlodar pankratıonshylarynyń jolyn baılady
ASTANA. QazAqparat - Pavlodarlyq pankratıonshylar «qoldyń qysqalyǵyna» baılanysty QR chempıonattaryna qatysý múmkindiginen qaǵylyp otyr.
Bul týraly jekpe-jek aıqastardyń pankratıon jəne grepplıng boıynsha Pavlodar oblystyq federatsııasynyń prezıdenti Altynbek Rysjanov málim etti dep habarlaıdy pavlodarnews.kz.
- Kúni keshe Pavlodarda pankratıonnan balalar, jasóspirimder men eresekter arasynda oblystyq chempıonat ótti. Oǵan 10 komandany quraǵan 200-ge tarta sportshy qatysty. Jalpykomandalyq esepte 21 altyn medal utyp alǵan Aqsý quramasy birinshi oryndy ıelendi. Ekinshi orynǵa 18 altyndy enshilegen pavlolarlyq «Abylaı» klýby jaıǵasty. Alty altyn alǵan taǵy bir pavlolarlyq «Almaz» klýby úshtikti qortyndylady, - dedi Altynbek Rysjanov. Eń jas sportshylar nebári 10-11-de, olar eń jeńil 29 keli salmaqta kúsh synasty. Eń aýyr salmaq 100-den joǵary. Jalpy, pankratıonshylar 43 salmaq dárejesinde ózara úzdikterdi anyqtady.
- Jýyq arada eresekter arasynda Qyzylorda qalasynda jáne balalar, jasóspirimder arasynda Qaraǵandy qalasynda respýblıkalyq chempıonat ótedi. Odan jeńimpaz atanǵandar álemdik jarysqa joldama alady. Ókinishke oraı, pavlodarlyq sportshylardyń barlyǵy el birinshiligine qatysa almaıdy, qarjy joq. Eresekterge bir adamǵa 40 myń, balalarǵa 20 myń teńgedeı kerek. Sonyń saldarynan tek 30-ǵa tarta sportshymyz saıysqa barýy múmkin, kóbi qatysa almaıdy. Bizde talantty jastar az emes, - dep túsindirdi federatsııa prezıdenti.
Aıta keteıik, oblysta pankratıon sportymen shuǵyldanatyn jastar sany jyl sanap artyp keledi. Ótken jyly bul jarysqa 120-ǵa tarta jas qatysqan edi.
