Qarjynyń deni sportshylardyń joǵary tarıfpen ushýyna jumsalady – mınıstr

ŞÝChINSK. QazAqparat – Sportqa bólinetin qarajattyń kóp bóligi sportshylardyń jarystar men daıyndyqtarǵa joǵary tarıfpen ushýyna jumsalady. Atalǵan máseleni QR Mádenıet jáne sport mınıstri Dáýren Abaev alǵa tartty, dep habarlaıdy QazAqparat tilshisi.

«Ulttyq olımpıada komıtetiniń kúntizbe josparyna qaıta-qaıta ózgertýler men tolyqtyrýlar engizýdi toqtatatyn kez keldi. Ótken jyly qysqy sport túrleri boıynsha 71 is-sharaǵa, jazǵy sport túrleri boıynsha 200-den astam is-sharaǵa ózgerister men tolyqtyrýlar engizildi. Josparlaýdyń qısyqtyǵynan qarjynyń deni sportshylardyń joǵary tarıfpen ushýyna jumsalady», - dedi Dáýren Abaev Şýchınskide ótken XXIV qysqy olımpıada oıyndarynyń qorytyndysyna arnalǵan keńeıtilgen otyrysta.

Onyń aıtýynsha, sport dırektsııasy sharalar kúntizbesi men jarystarǵa daıyndyq protsesin qatań baqylaýǵa alýy kerek.

«Biz sportshy daıarlaýdy, daıyndyq jospary men jattyǵý protsesin bas jattyqtyrýshyǵa tolyqtaı senip tapsyramyz. Al quzyrly organdarǵa qarjyny ýaqytynda bólý jáne sportshylardy sapaly daıarlaý úshin qolaıly jaǵdaı jasaý mindeti júkteledi», - deıdi ol.

Buǵan deıin mınıstr frıstaıl-mogýldan ulttyq quramasynyń bas jattyqtyrýshysy Elena Krýglyhınaǵa qatysty qyzmettik tekseris júrip jatqanyn aıtty.

Sondaı-aq, D. Abaev birqatar sportta bas jattyqtyrýshylardyń qyzmetten ketýi múmkin ekenin tilge tıek etti.