Qarjyny uqsata almaǵan sheneýnikter jumystan qýylady - baspasózge sholý
***
«Egemen Qazaqstan» basylymynyń búgingi sanynda QR Prezıdenti Nursultan Nazarbaevtyń kásipkerlerdi qoldaý týraly Málimdemesiniń tolyq mátini jarııalandy.
Onda Elbasy 27 aqpanda elimizdegi kásipkerlik qyzmettiń damýyna qajetti jaǵdaılardy jaqsartý jónindegi túbegeıli sharalar týraly Jarlyqqa qol qoıǵandyǵyn, 2 sáýirden bastap, 2015 jyldyń 1 qańtaryna deıin shaǵyn jáne orta bıznes sýbektilerine tekseris júrgizýge moratorıı jarııalaǵandyǵyn málimdeıdi. «Men qazaqstandyqtardyń bıznes júrgizýine qajetti jaǵdaıdy ári qaraı jaqsarta túsý maqsatynda Úkimetke birqatar naqty sharalar qabyldaýdy júktedim», - dep atap ótken Prezıdent, sol tapsyrmalardyń negizgi tórt baǵytyna toqtalady.
«Qurmetti qazaqstandyqtar! Kásipkerlikti, ásirese, shaǵyn jáne orta bıznesti damytý - «Qazaqstan 2050» Strategııasynyń eń basty mindetteriniń biri. Meniń Jarlyǵymdy júzege asyrý Qazaqstanda kásipkerlik qyzmetti damytýǵa qajetti jaǵdaılardy túbegeıli jaqsartýdy qamtamasyz etedi. Bul - bıznes júrgizip otyrǵan árbir qazaqstandyqqa naqty kómek. Kásipkerlerdiń jumysyna qajetti jaǵdaıdy udaıy jaqsartyp otyrý árqashan da memlekettiń basty nazarynda bolady», - delingen atalmysh málimdemede.
***
Eldi eleńdetken, «temir tulparly» qazaqstandyqtardy alańdatqan «Jol júrisi týraly» jańa zań jobasy «qabyldaýdyń sońǵy satysyna» shyqty, dep jazady «Aıqyn» gazeti.
Osy oraıda Qasym-Jomart Toqaevtyń tóraǵalyǵymen ótken Senattyń keshegi jalpy otyrysy tolyǵymen osy jobaǵa arnalǵan. Onyń ishinde qyzý talqylanǵany Jol polıtsııasy qyzmetkerleriniń júrgizýshilerdi orynsyz toqtatýdy doǵarý jaıy, júrgizýshiniń jáne onyń jolaýshysynyń kólikten shyǵýyna tyıym salý máseleleri qyzý talqyǵa tústi.
«Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy Serik Aqylbaıdyń aıtýynsha, zań jobasyn talqylaý barysynda Májilis maquldaǵan zań nusqasyna ózgerister men tolyqtyrýlar engizý qajettiligi týyndapty.
Máselen, ishki ister organynyń qyzmetkeri toqtatqan jaǵdaıda onyń ruqsatynsyz júrgizýshiniń jáne onyń jolaýshysynyń kólikten shyǵýyna tyıym salynbaq. Osyǵan oraı senatorlar júrgizýshi men jolaýshyǵa kólik kabınasyn tastap ketýge jol polıtsııasy qyzmetkeriniń qandaı jaǵdaılarda ruqsat bere alatynyn zańda naqty jazyp kórsetýdi usynady.», - delingen gazettiń búgingi sanynda jarııalanǵan «Jaza kúsheıip, aıyppul artady» atty maqalada.
***
«Mıllıardtaǵan qarjyny uqsata almaǵan, ıaǵnı, ıgere almaǵan sheneýnikterdi qyzmetten qýýy múmkin. QR Qarjy mınıstri Baqyt Sultanov Premerge usyndaı usynys aıtty», - dep jazady «Túrkistan» basylymy «Qarjyny uqsata almaǵan sheneýnikter jumystan qýylady» atty maqalasynda.
Materıal avtorynyń aıtýynsha, túptiń túbinde zardap shegetin - qarjyny ıgere almaǵan sheneýnikter emes, qarapaıym halyq.
«Jyldaǵy bitpeıtin daý: memlekettik bıýdjettiń ıgerilmeı qalýy. Osynyń saldarynan halyqqa aýadaı qajet aýrýhana, emhana, mektep, balabaqsha sekildi áleýmettik nysandardyń qurylysy bitpeıdi ne múlde bastalmaıdy, joldar jóndelmeıdi, aýyz sýmen qamtamasyz etýi tıis baǵdarlamalar qalady jarty jolda qańtarylyp... Zardap shegetin - qarjyny ıgere almaǵan sheneýnikter emes, qarapaıym halyq».
***
«Samuryq-Qazyna» AQ belsendi túrde ınvestıtsııa salýdy josparlaýda, dep jazady «Kazahstanskaıa pravda» basylymy.
«Fond gotovıtsıa k transformatsıı» atty maqalada Ulttyq ál-aýqat qory úlken ózgeris aldynda turǵandyǵyn habarlaıdy. Onyń ishinde shyǵyndardy qysqartý, profıldi emes aktıvterdi qor menshiginen shyǵarý, iri ınvestjobalarǵa qatysý, qordyń áleýmettik jáne ınvestıtsııalyq saıasatynyń tolyq transformatsııalanýy kózdelýde. Osy maqsatta quramyna qor kompanııalarynyń basshylary men top-menedjer engen arnaıy komıssııa da qurylǵan. Aýqymdy ózgeristerge aldymen QazMunaıGaz, QTJ, Qazposhta jáne «QazMunaıGaz» Barlaý, óndirý» kompanııalary ushyramaq.
