Qarjyny kóleńkeli aınalymǵa shyǵarý úshin sheteldik fırmalar paıdalanylyp júr – Senat depýtaty

ASTANA. QazAqparat – Senat depýtaty Andreı Lýkın Qazaqstanda kompanııa tirkep, keıin ony túrli qarjylyq aıla-sharǵylarǵa paıdalanatyn tásil bar ekenin aıtyp, Premer-Mınıstrdiń orynbasary – Qarjy mınıstri Erulan Jamaýbaevqa saýal joldady, dep habarlaıdy QazAqparat tilshisi.

Senatordyń málimetinshe, sheteldikter Qazaqstanda óz kompanııalaryn tirkegennen keıin bizdiń elden ketip qalady, alaıda qurylǵan fırmalardy jalǵan shot-faktýralar jazý, salyq tóleýden jaltarý jáne qarjyny kóleńkeli aınalymǵa shyǵarý úshin paıdalanady.

«Bıznes-ımmıgranttardyń vızasyz 198 kompanııasynda 4 mlrd teńge bereshegi bar. 1,5 myńnan astam kompanııa tirkeý ornynda joq jáne 2 myńǵa jýyq fırma jumys istemeıdi. Bul tolyq derek emes. Memlekettik kirister organdary zańdy tulǵany qurý kezinde zańnamalyq buzýshylyqtarǵa jol berýine baılanysty ony taratý jolymen talap qoıýǵa quqyly. Zańdy tulǵany qurǵan sheteldiktiń bıznes-ımmıgrant vızasyn almaýy osyndaı buzýshylyqtyń biri bolyp tabylady. Alaıda, respýblıkalyq mańyzy bar oblystar men qalalarda belgilengen zańdy tulǵanyń memlekettik tirkeýden ótýin taný sharalary jalpyǵa birdeı qolǵa alynbaǵan», - dedi senator.

Sondaı-aq, ol halyqqa qyzmet kórsetý ortalyqtary sheteldikterdiń bıznes-ımmıgrant vızasy bolmasa da, zańdy tulǵany tirkeýden ótkize beretinin problema etip kóterdi.

«Qalyptasqan jaǵdaı sheteldik azamattardyń kúmándi zańdy tulǵa qurýyna yqpal etedi, olar keıinnen qarjysyn kóleńkeli aınalymǵa shyǵarý shemalarynda qoldanýy ábden múmkin. Osyǵan baılanysty, bıznes-ımmıgranttarǵa salyq salý jáne kóshi-qon máseleleri boıynsha vedomstvolyq baqylaýdy kúsheıtýdi, búkil el boıynsha bıznes-ımmıgranttardyń tikeleı qatysýymen salyq tólemderi men zańdy qyzmet júrgizý turǵysynda kompanııalar men fırmalarǵa aýdıtorlyq tekserýler júrgizýdi, sondaı-aq bıznes-ımmıgranttarmen quqyqtyq qatynastardy retteý tetigin jetildirý jóninde zańnamalyq túzetýlerge bastamashylyq jasaýdy usynamyn», - dedi depýtat.