Qarjylandyrýdyń jańa modeli sot júıesiniń táýelsizdigin arttyrady - Senat tóraǵasy

NUR-SULTAN. QazAqparat – Senat tóraǵasy Máýlen Áshimbaev sot júıesin jetildirý men daýlardy sottan tys retteýge qatysty qabyldanǵan zańdarǵa pikir bildirdi, dep habarlaıdy QazAqparat tilshisi.

«Búgin qabyldanǵan zańdar Memleket basshysynyń sot júıesin jetildirýge arnalǵan bastamalaryn iske asyrý úshin ázirlendi. Parlament depýtattary bastamashyl bolǵan zańdar elimizdegi sot júıesin odan ári jańǵyrtýdy kózdeıdi. Atap aıtqanda, sot júıesin qarjylandyrýdyń jańa modelin bekitý arqyly sot júıesiniń jáne sýdıalardyń táýelsizdigin arttyrady. Sýdıa laýazymyna úmitkerlerdi irikteý júıesin jáne sýdıalardy konkýrstyq irikteý tetikterin jetildiredi. Jańa normalar sot júıesinde zamanaýı tehnologııalardy keńinen paıdalanýǵa da múmkindik beredi», - dedi M. Áshimbaev Senattyń jalpy otyrysynda.

Onyń paıymynsha, jańa normalar Joǵarǵy sot Keńesiniń jáne Joǵarǵy sottyń plenarlyq otyrysynyń quzyretterin keńeıtedi.

«Qabyldanǵan zańdardar azamattyq-quqyqtardy qorǵaýdyń sottan tys jáne sotqa deıingi retteý tetikterin damytady. Medıatsııa ınstıtýtynyń keńinen qoldanylýy úshin jańa quqyqtyq erejeler de qabyldandy. Jalpy, bul normalar sot júıesine mańyzdy jańashyldyqtar engizip otyr. Olar sot júıesiniń tıimdiligin arttyrady dep senemiz», - dedi Senat tóraǵasy.

Budan buryn habarlanǵandaı, jalpy otyrysta «Qazaqstan Respýblıkasynyń sot júıesi men sýdıalarynyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq Zańy, sondaı-aq «Qazaqstan Respýblıkasynyń keıbir zańnamalyq aktilerine sot júıesi máseleleri boıynsha ózgerister men tolyqtyrýlar engizý týraly» ilespe zańy qabyldandy.

Budan bólek senatorlar «Qazaqstan Respýblıkasynyń keıbir zańnamalyq aktilerine azamattyq protsestik zańnamany jetildirý jáne daýlardy sottan tys jáne sotqa deıingi retteý ınstıtýttaryn damytý máseleleri boıynsha ózgerister men tolyqtyrýlar engizý týraly» zańyn da qabyldady.