Qarjy sektoryndaǵy oń ózgerister el ekonomıkasyna yqpal etedi - Borıs Ýmanov
ALMATY. 21 jeltoqsan. QazAqparat /Erlik Erjanuly/ - «Eýrazııa» saqtandyrý kompanııasy» AQ-nyń Basqarma tóraǵasy Borıs Ýmanovtyń aıtýynsha, ekonomıka munaı men metall baǵasyna áli de táýeldi.
Sondyqtan úkimet shıkizat baǵasyna ǵana ıek artpaı, aldaǵy jyly qarjy salasyna kóbirek mán berýi kerek. Bul pikirin ol búgin Almatyda kompanııanyń 2010 jyldyń aldyn ala qorytyndylary jarııalanǵan baspasóz máslıhatynda bildirdi.
«Qazaqstan úshin aldaǵy ýaqytta búkil qarjy sektory boıynsha kóbirek jumys istegen jón bolar edi. Óıtkeni ondaǵy oń ózgerister el ekonomıkasyna tutastaı yqpal etedi», - deıdi Borıs Ýmanov.
Onyń aıtýynsha, qarjy sektorynda zeınetaqy qorlaryndaǵy salymshylardyń kóshi-qony erekshe kóńil bólýdi qajet etip otyr. Sebebi zeınetaqy qorlary iri ınstıtýttyq ınvestorlar sanalady. Jalpy aldaǵy jyly qarjy salasy turaqty bolady dep boljam jasalýda.
