Qarjy saýattylyǵyn arttyrý úshin qansha qazaqstandyq kómekke júgingen
NUR-SULTAN. QazAqparat – Qarjy salasyndaǵy túrli suraqtar boıynsha el azamattary jedel jelige 23 myńnan astam habarlama qaldyrǵan. Bul týraly fingramota.kz júrgizigen taldaýdyń nátıjesinde belgili boldy, dep habarlaıdy QazAqparat.
Qarjylyq qyzmetterdi tutynýshylardyń quqyqtary men múddelerin qorǵaý máseleleri boıynsha azamattardyń ótinishterine jedel den qoıý maqsatynda QR Qarjy naryǵyn retteý jáne damytý agenttigi 2020 jylǵy 26 naýryzdan bastap qarjylyq qyzmetterdi tutynýshylardyń quqyqtaryn qorǵaý máseleleri boıynsha jedel jelini iske qosty.
«Jedel jeli arqyly qazirgi kezde azamattardan qarjylyq qyzmetterdi tutynýshylardyń quqyqtaryn qorǵaý, onyń ishinde karantın kezeńinde kredıtter boıynsha merzimin keıinge qaldyrýǵa ruqsat alý, qashyqtan banktik qyzmet kórsetý máseleleri boıynsha 23 myńnan astam qońyraý kelip tústi jáne óńdeldi», - delingen habarlamada.
Halyqtyń qarjy retteýshisimen ózara is-qımyly maqsatynda jáne QR Úkimetiniń bıylǵy 30 mamyrdaǵy №338 Qaýlysymen bekitilgen Qarjylyq saýattylyqty arttyrýdyń 2020-2024 jyldarǵa arnalǵan tujyrymdamasy boıynsha is-sharalar josparyn iske asyrý aıasynda Agenttik 2020 jylǵy 25 maýsymnan bastap «Fingramota Online» mobıldi qosymshany iske qosty. Bul qarjy retteýshisiniń halyqpen jáne bıznespen ózara is-áreketiniń yńǵaıly quraly. Osy messendjer arqyly qarjy retteýshisine qarjylyq qyzmetterdi tutynýshylardyń quqyqtary men múddelerin qorǵaý, qarjy jáne ózge de uıymdardyń qyzmeti, qarjylyq saýattylyqty arttyrý, Ipotekalyq turǵyn úı qaryzdaryn qaıta qarjylandyrý baǵdarlamasyn iske asyrý ári basqa da máseleler boıynsha 1800-den astam suraq kelip túsken.
