Qarjy salasyndaǵy barlyq qyzmet elektrondy formatqa kóshiriledi – Qarjy mınıstri

NUR-SULTAN. QazAqparat – Barlyq qyzmet túri elektrondy formatqa kóshiriledi. Bul týraly onlaın rejımde halyq aldynda esep berýi kezinde Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Vedomstvonyń qurylymyna toqtalsam, qazir Qarjy mınıstrliginiń shtat sany 16 247 birlikti quraıdy. Sońǵy eki jylda mınıstrlik aýqymdy ońtaılandyrý jumystaryn júrgizdi. Osy oraıda 1 965 birlik qysqartyldy. Búgingi tańda Mınıstrliktiń qurylymy ortalyq apparattan, 4 vedomstvodan jáne 3 vedomstvolyq baǵynysty uıymnan turady», - dedi E. Jamaýbaev.

Onyń aıtýynsha, mınıstrlik tarapynan jeke jáne zańdy tulǵalarǵa memlekettik qyzmettiń 50 túri kórsetiledi, onyń ishinde 46 nemese 92% elektrondyq túrde júrgiziledi.

«2020 jyly barlyǵy 22,9 mln memlekettik qyzmet kórsetildi, onyń ishinde 22,2 mln nemese 97% elektrondyq túrde. Bolashaqta barlyq qyzmet túrin elektrondy formatqa kóshirý josparymyzda bar. Jalpy, mınıstrlik óz qyzmetinde barynsha ashyqtyq pen konstrýktıvti tásildi alǵa tartady. Qoǵammen tyǵyz baılanysta jumys isteımiz. Memlekettik qarjy qoǵamdyq keńesi óz jumysyn sátti atqarýda. Osynyń barlyǵy Memleket basshysynyń «Halyq únine qulaq asatyn memleket» tujyrymdamasyna saı keledi», - dedi mınıstr.