Qarjy polıtsııasynyń jalǵan kásipkerlikpen kúresi nátıjesinde bıýdjetke túsetin salyqtar kóbeıdi
ASTANA. 30 shilde. QazAqparat - QR Ekonomıkalyq qylmysqa jáne sybaılas jemqorlyqqa qarsy kúres (qarjy polıtsııasy) agenttiginiń jalǵan kásipkerlik pen jalǵan mámileler jasaý faktilerin anyqtaýy 5 ese artqan.
Bul týraly búgin 2013 jylǵy birinshi jartyjyldyq qorytyndysy boıynsha alqa otyrysynda vedomstvo basshysy Rashıd Túsipbekov málim etti, dep habarlaıdy agenttiktiń baspasóz qyzmetinen.
Onyń bergen málimetinshe, jalǵan mámileler jasaý ústinde ustaý 3 esege deıin kóbeıgen. Nátıjesinde ekinshi deńgeıli bankterde qolma-qol aqshaǵa almastyrylǵan qarajattyń somasy 605 mlrd. teńgeden 511 mlrd. teńgege deıin nemese 16%-ǵaazaıǵan. Al buryn aqshany qolma-qol aqshaǵa aýystyrý turaqty túrde ósip otyrǵan.
Qarjy polıtsııasynyń osy baǵyttaǵy jumysynyń jandanýy sonymen qatar shaǵyn jáne orta bıznesten bıýdjetke túsetin salyqtardyń 27%-ǵa artýyna óz áserin tıgizdi.
«Sonymen qatar, jalǵan jáne qasaqana bankrottyq faktileri boıynsha qylmystardy ashý 3 esege deıin ósken, bul bankrottyqqa túsetin kásiporyndardyń bıýdjet aldyndaǵy qaryzynyń 45%-ǵa nemese 32 mlrd. teńgeden 17 mlrd. teńgege deıin tómendeýine yqpal etti», - dep atap ótti R. Túsipbekov.
Sondaı-aq, bıýdjetten qosymsha qun salyǵyn zańsyz keri qaıtarý qylmystaryn anyqtaý 2,5 ese kóbeıgen. Bul bıýdjetten qaıtarylatyn somalardyń azaıýyna ákelip soqty. Eger 2012 jyly kásipkerlerge bıýdjetten 450 mlrd. teńge qaıtarylsa, osy jyldyń 6 aıynda ol 83 mlrd.teńgeni quraǵan.
