Qarjy polıtsııasynyń tóraǵasy R.Túsipbekov kásipkerlik sýbektileriniń qyzmetine zańsyz aralasýdy joıýdy talap etti
ASTANA. 20 aqpan. QazAqparat - 17 aqpanda Ekonomıkalyq qylmysqa jáne sybaılas jemqorlyqqa qarsy kúres agenttiginde Memleket basshysynyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýyn iske asyrý máseleleri talqylandy.
Bul týraly Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) baspasóz qyzmetinen habarlady.
Agenttik tóraǵasy Rashıd Túsipbekov Prezıdenttiń bergen tapsyrmalary sheńberinde qarjy polıtsııasy organdarynyń aldaǵy kezeńdegi jumysynyń maqsatyn naqtylady.
Atap aıtqanda, Agenttiktiń kúsh-jigeri sybaılas jemqorlyq pen «kóleńkeli» ekonomıkamen júıeli kúreske, bıýdjet qarajatyn urlaý faktileriniń jolyn kesýge, sondaı-aq sapaly kadrlarmen jańartýǵa baǵyttalýy tıis ekendigin atap ótti.
Jedel bólimshelerdiń jumysy tek qozǵalǵan qylmystyq isterdiń sanymen baǵalanatyn «taıaqtaý» júıesinen bas tartýdy talap etti. Jumystyń túpki maqsaty kináli tulǵany sottaýmen qatar, qylmystardy jasaýǵa negiz bolatyn sebepter men sharttardy joıý bolyp belgilendi.
R.Túsipbekov: «Eń bastysy, qylmystardyń aldyn alý qajet. Biz sybaılas jemqorlyq jáne ekonomıkalyq qylmystardy jasaýdyń aldyn alyp jáne olardyń jolyn kesýge tıispiz. Qylmysty jasaýǵa negiz bolatyn sebepter men sharttardy joıý qajet», dep atap ótti.
Sybaılas jemqorlyqqa qarsy kúres baǵyty boıynsha jeke quramnyń nazary para bopsalaý jáne bıýdjet qarajatyn urlaýmen júıeli túrde aınalysatyn tulǵalardy qylmystyq jaýapkershilikke tartýǵa baǵyttalatyn bolady.
Qylmystyq tabystardy «jylystatýǵa» jáne olardy elden shyǵarýǵa qarsy kúres, sonymen qatar jalǵan kásiporyndar qyzmetiniń jolyn kesý - basym baǵyttar retinde anyqtaldy.
Agenttik tóraǵasy tekserister men qylmystyq isterdi tergeý barysynda kásipkerlik sýbektileriniń qyzmetine zańsyz aralasýdy joıýdy talap etti.
Ol úshin R.Túsipbekov ekonomıkalyq salamen jáne bıznes-qurylymdarymen jumys jasaý kezindegi qarjy polıtsııasy organdary ýákilettikteriniń shegi men sheńberin, sondaı-aq baqylaýshy organdardyń kásipkerlik sýbektilerdiń qyzmetin tekserýge bastamashylyq jasaý úshin qajetti negizdemelerdiń tolyq tizbesin normatıvtik deńgeıde anyqtaýdy tapsyrdy.
Sonymen qatar, mundaı tekserý tek aýmaqtyq departament bastyǵynyń jazbasha kelisimi boıynsha ǵana júrgizilý múmkindigi bekitilip, al jeke kásipkerlik sýbektisin zańsyz tekserý taǵaıyndalǵan jaǵdaıda - tekserýge bastamashylyq jasaǵan adam ǵana emes, oǵan kelisim bergen basshysy da laýazymynan bosatý túrindegi jaýapkershilikke tartylatyndyǵy anyqtaldy.
Elbasynyń tapsyrmasyna sáıkes, qarjylyq-ekonomıkalyq qylmystardy, onyń ishinde keıbir salyqtyq qylmystardy dekrımınalızatsııalaý jumysyn jalǵastyrý júkteldi. Qylmystyq áreketterdiń arasynda tek qoǵamǵa jáne memleketke eleýli qaýip týdyratyndary ǵana qaldyrylatyn bolady.
Agenttik sondaı-aq sybaılas jemqorlyq áreketterdiń tizbesin olardy jemqorlyq qylmystarǵa jatqyzý negizdiligi boıynsha zerdeleıdi.
Keńes barysynda R.Túsipbekov Agenttik tóraǵasynyń jańa taǵaıyndalǵan orynbasarlaryn ujymǵa tanystyryp ótti.
Eske salsaq, 2012 jylǵy 16 aqpandaǵy Elbasynyń ókimimen Agenttik tóraǵasynyń birinshi orynbasary bolyp A.Lýkın, Agenttik tóraǵasynyń orynbasarlary bolyp M. Ahmetjanov pen A. Bodanovtar taǵaıyndaldy.
