Qarjy polıtsııasynyń resmı ókili osy saladaǵy kadrlyq ózgeristerdiń sebebin túsindirdi

ASTANA. 15 naýryz. QazAqparat - Búgin jýrnalıstermen bolǵan brıfıngte Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı osy salada bolyp jatqan kadrlyq ózgeristerdiń sebebin túsindirdi.

Onyń sózine qaraǵanda, agentiktiń Іshki qaýipsizdik basqarmasynyń qyzmetkerleri Almaty qalalyq Qarjy polıtsııasy departamentiniń Erekshe mańyzdy ister departamentiniń aǵa ınspektory Hasanovty para alý ústinde qolǵa túsirgen.

«Osyǵan baılanysty Almaty qalasynyń qarjy polıtsııasy departamentiniń bastyǵy Maqsat Dúısenovtiń qyzmetinen bosatylǵandyǵyn aıtqanbyz. Sonymen qatar, agenttiktiń birqatar departamentiniń basshylyǵyna jańa azamattar keldi. Óıtkeni agenttik basshylyǵy qarjy polıtsııasy qyzmetkerleriniń aldyna jańa mindetter qoıyp otyr jáne jańa qyzmetke kirisken azamattar sol mindetterdi talapqa saı atqarady degen senimdemiz»,-dedi resmı ókil.