Qarjy polıtsııasynyń qyzmetkerine 1 myń dollar para usynǵan memlekettik mekeme basshysy 3 jylǵa sottaldy

Bul týraly QazAqparat tilshisine Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlandy.

Baspasóz qyzmetiniń málimetterine qaraǵanda, Qaraǵandy oblysyndaǵy «Temirtaý qalalyq kásipkerlik jáne aýyl sharýashylyǵy bólimi» memlekettik mekemesiniń bastyǵy A.Ospanov 2010 jylǵy sáýirde dúkende alkogol ónimderin saqtaý jáne satýǵa lıtsenzııanyń bar-joǵyn tekserý kezinde máseleni oń sheshý úshin qarjy polıtsııasynyń qyzmetkerine 1 myń AQSh dollary kóleminde para usynǵan.

Sonymen qatar A.Ospanov óziniń qyzmettik ókilettigin teris paıdalanyp, dúkenniń turǵan jeri mektepke júz metrden jaqyn ekenin bile turyp, alkogol ónimderin saqtaý jáne bólshektep satý quqyǵy týraly memlekettik lıtsenzııaǵa qol qoıyp, jeke kásipkerden 2 myń AQSh dollary somasynda aqsha alǵan.

Temirtaý qalalyq sotynyń úkimimen A.Ospanov para berip, qyzmet ókilettigin teris paıdalandy degen aıyppen 3 jylǵa bas bostandyǵynan aıyryldy.