Qarjy polıtsııasynyń qylmystyq isterdi sotqa joldaýy 1,5 esege artty
ASTANA. 30 shilde. QazAqparat - Qarjy polıtsııasynda tergeý sapasy burynǵymen salystyrǵanda birshama jaqsardy.
Bul týraly Ekonomıkalyq jáne sybaılas jemqorlyq qylmystarǵa qarsy kúres agenttiginiń tóraǵasy Rashıd Túsipbekov vedomstvonyń alqa otyrysynda aıtty.
Onyń sózine qaraǵanda, qarjy polıtsııasy organdarynyń óndirisinde bolǵan qylmystyq isterdiń sany ótken jylmen salystyrǵanda 36%-ǵa artqan, tergeý barysynda qysqartylatyn qylmystyq isterdiń sany 15%-ǵa tómendegen, qosymsha tergeýge qaıtarylǵan qylmystyq isterdiń sany shırekke azaıdy.
Sonymen qatar, qylmystyq isterdi sotqa joldaý 1,5 esege joǵarylap, barlyq aıaqtalǵan isterdiń 80%-yn qurady.
«Negizinen oǵan qarjy polıtsııasynda sotqa deıingi óndiristi jetildirý boıynsha qabyldanǵan sharalar sebep boldy. Barlyq bólimshelerde kezekshi ofıtser laýazymy engizildi, bekitilgen jańa qurylym polıtseılik tergeý qaǵıdasynyń barlyq talaptaryna sáıkes keledi», - dep atap ótti R. Túsipbekov.
Sondaı-aq, materıaldar boıynsha tekseris júrgizý jedeldigi artqan. Eger buryn aryzdardyń jartysy derlik 2 aıǵa deıin tekserilse, búgin olar boıynsha tekseris 3 táýlikke deıin ǵana júredi.
Qylmystyq is júrgizýdiń jeńildetilgen tártibi keńinen qoldanylýda. Jeńildetilgen tártippen aıaqtalǵan isterdiń sany 3 ese kóbeıdi.
