Qarjy polıtsııasynyń 3194 qyzmetkeri jalpy attestattaýdan ótedi
ASTANA. 3 mamyr. QazAqparat - Qarjy polıtsııasynyń 3194 qyzmetkeri jalpy attestattaýdan ótedi. Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.
Onyń atap ótýinshe, qazirgi ýaqytta qarjy polıtsııasy organdary qyzmetkerlerin kezekten tys attestattaýdan ótkizýge daıyndyq júrgizilýde. Atalǵan shara attestattaýdan ótetin qyzmetkerdiń eńbek ótili men tájirıbesin, qoıylǵan mindetterdi atqarýǵa qatysý deńgeıin jáne jumysynyń kúrdeliligi, nátıjesi men tıimdiligin eskere otyryp laýazymyna qoıylatyn talaptarǵa qanshalyqty sáıkes keletindigin, onyń adamgershilik tulǵasyn sıpattaıtyn kásibı jáne jeke qasıetterin baǵalaý maqsatynda uıymdastyrylady.
Attestattaý qyzmetkerlerdiń Qazaqstan Respýblıkasy zańnamasyn bilýin jáne logıkalyq oılaý qabiletin anyqtaý úshin kompıýterlik testileý, dene shynyqtyrý, áskerı jáne qyzmettik daıyndyq boıynsha bekitilgen normatıvterdi tapsyrý jáne psıhologııalyq turaqtylyqqa suhbattasý, komıssııanyń qyzmetkermen suhbattasýy jáne komıssııanyń sheshim qabyldaýy syndy birneshe kezeńde júzege asyrylatyn bolady.
«Halyqaralyq uıymdarǵa, memlekettik bılik organdaryna issaparǵa jiberilgen qyzmetkerler, júktiligine nemese bala týýyna, bala kútimine baılanysty demalystaǵy qyzmetkerler jáne shetelde oqýda júrgen qyzmetkerler kezekten tys attestattaýǵa jatpaıdy. Jalpy attestattaýǵa qarjy polıtsııasynyń 3194 qyzmetkeri, onyń ishinde: joǵary attestattaý komıssııasynyń attestattaýyna 73 qyzmetker kiredi. Olardyń qataryna tóraǵanyń birinshi orynbasary, tóraǵanyń orynbasarlary, agenttik apparatynyń basshysy, ortalyq apparattyń departament bastyqtary, oblystardaǵy, Astana jáne Almaty qalalaryndaǵy qarjy polıtsııasy departamentteriniń bastyqtary men olardyń orynbasarlary, Qarjy polıtsııasy akademııasynyń bastyǵy jatady», - dedi ol.
Sonymen qatar resmı ókildiń aıtýynsha, ortalyq attestattaý komıssııasyna 479 qyzmetker kiredi. Olar - ortalyq apparat qyzmetkerleri, taǵaıyndaýy men jumystan bosatýy agenttik nomenklatýrasyna kiretin qarjy polıtsııasynyń aýmaqtyq organdarynyń qyzmetkerleri. Al aýmaqtyq attestattaý komıssııalarynda qarjy polıtsııasynyń aýmaqtyq organdarynyń 2610 qyzmetkeri bar.
«Attestattaýdy ótkizý kezinde obektıvtilik pen shynaıylyqty qamtamasyz etý jáne zań buzýshylyq faktileriniń aldyn alý maqsatynda qarjy polıtsııasynyń attestattaý komıssııalarynyń jumystaryna azamattyq qoǵam, buqaralyq aqparat quraldary men ardager uıymdarynyń ókilderin qatystyrý josparlanyp otyr», - dedi M. Jumanbaı.
