Qarjy polıtsııasy jalpy zalal mólsheri 70 mlrd.teńgeni quraıtyn 200-den astam qylmysty anyqtady

Bul týraly búgin Qarjy polıtsııasy agenttiginiń tóraǵasy Rashıd Túsipbekov alqa otyrysynda málim etti, dep habarlaıdy vedomstvonyń baspasóz qyzmetinen.

«Jumysymyzdaǵy basymdyqtardy qylmystardyń aldyn alý men olardy boldyrmaýǵa baǵyttap, biz qylmystardy bastapqy satylarynda, ıaǵnı, memleketke zalal keltirýge jetkizbesten anyqtaı bastadyq», - dedi Rashıd Túsipbekov.

Agenttik Ahýaldyq ortalyǵynyń jumysynyń arqasynda jyl basynan 1,5 mlrd. teńge bıýdjet qarajatynyń maqsatsyz jumsalýynyń aldyn aldy.

Taldaý materıaldarynyń negizinde jalpy zalal mólsheri 70 mlrd.teńgeni quraıtyn 200-den astam qylmystyq is qozǵaldy.

Mysaly, Aqtóbe oblysyndaǵy memlekettik satyp alýlardy monıtorıngileý barysynda bıýdjet qarajatyn urlaý jáne jalǵan kásipkerlikpen aınalysqan uıymdasqan qylmystyq toptyń qyzmeti áshkerelendi. Olardyń qyzmetinen memleketke 16 mlrd.teńge zalal keltirilgen.

«Jumystaǵy osyndaı ustanym bıznestiń qyzmetine zańsyz aralasýdy barynsha azaıtýǵa múmkindik berdi, sebebi qylmystar kabınetten shyqpaı ashylady. Eger 2011 jyly osyndaı 18 fakt oryn alsa, 2012 jyly - 6, al osy jylǵy 6 aıda tek 1 faktige jol berildi», - dedi R.Túsipbekov.

Aldyn alý sharasy retinde memlekettik organdarǵa zań buzýshylyqtarǵa jaǵdaı jasaıtyn sebepter men jaılardy joıý týraly 275 usynys engizildi. Ol ótken jyldyń uqsas merzimimen salystyrǵanda 27%-ǵa kóp.

Olardy qarastyrý nátıjesinde 210 laýazymdy tulǵa tártiptik jaýapkershilikke tartyldy, onyń 116-sy jumystan shyǵaryldy.

Vedomstvo basshysy atalmysh jumysty ary qaraı jalǵastyrýdy tapsyrdy.