Qarjy polıtsııasy J. Dosqalıevtiń advokatynyń sot-medıtsınalyq saraptaý jumystaryn júrgizý jónindegi qoldaý hatyn qanaǵattandyrdy
ASTANA. Qazannyń 28-i. QazAqparat /Aıdar Ospanalıev/ - Densaýlyq saqtaý mınıstrliginiń burynǵy basshysy J.Dosqalıevke Respýblıkalyq ulttyq ǵylymı-medıtsınalyq ortalyq qyzmetkerleri alǵashqyda qoıǵan dıagnozdy Reseıden kelgen mamandar jasaǵan zertteýler túbegeıli joqqa shyǵardy.
Bul týraly búgin Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
Onyń sózine qaraǵanda, reseılik mamandardyń zertteý nátıjeleri J.Dosqalıevte ne ınsýlttiń, ne kamatozdyq jaǵdaıdyń bolmaǵandyǵyn kórsetti. Sóıtip, burynǵy mınıstrdiń ótirik naýqastanyp jatqandyǵy rastaldy. Buny arnaıy júrgizilgen jedel-izdestirý sharalarynyń nátıjeleri de kórsetip otyr. «Qazirgi tańda J.Dosqalıev Astana qalasynyń tergeý oqshaýlaǵyshynyń sanıtarlyq bóliminde jatyr. Ázirge ol densaýlyǵynyń nasharlyǵyna shaǵymdanǵan joq. Osyǵan baılanysty qazir sot-medıtsınalyq saraptaý jumystaryn júrgizýdiń de qajeti joq. Soǵan qaramastan, osy ispen baılanysty tergeý-izdestirý jumystarynyń ashyqtyǵyn qamtamasyz etý úshin qarjy polıtsııasy organdary J.Dosqalıevtiń advokatynyń sot-medıtsınalyq saraptaý jumystaryn júrgizý jónindegi qoldaý hatyn qanaǵattandyrdy», -dedi resmı ókil.
Onyń sózine qaraǵanda, qazirgi tańda qylmystyq is tekserilýde. Ol týraly aqparattar qoǵam nazaryna tekserý jumystary aıaqtalǵan soń tolyǵymen jetkiziledi.
