Qarjy polıtsııasy J.Dosqalıevqa qatysty taǵy 2 qylmystyq is qozǵady

Bul týraly búgin elordada ótken baspasóz máslıhaty barysnyda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

«Medıtsınalyq akademııa aýmaǵynan turǵyn úı salýǵa jer ýchaskelerin zańsyz berý jáne salynǵan úılerden 11 páterdi para retinde alýdan bólek, Dosqalıevqa qatysty qyzmettik ókilettigin teris paıdalaný jáne bıýdjet qarajatyn urlaýdyń faktileri boıynsha 2 qylmystyq is qozǵaldy», - dedi resmı ókil.

Onyń atap ótýinshe, birinshi qylmystyq is Jedel járdem ǵylymı-zertteý ınstıtýtyn jalǵan aktiler arqyly mınıstrlik balansyna alýmen baılanysty bolsa, ekinshisi respýblıkanyń densaýlyq saqtaý mekemeleriniń qajettilikterine birneshe ese joǵary baǵamen «Densaýlyq saqtaýdyń salynyp jatqan nysandarynyń dırektsııasy» JShS-nen taýarlar men qyzmetterdi satyp alýmen baılanysty bolyp otyr.

«Dosqalıev qyzmetin paıdalanyp, óziniń buıryqtarymen Úkimet qaýlylaryna qajetti ózgeristerdi engizýdi usynbastan, 2009 jylǵy aqpan men naýryzda «Densaýlyq saqtaýdyń salynyp jatqan nysandarynyń dırektsııasy» JShS-niń qyzmet túrlerin zańnamamen tyıym salynbaǵan ózge de túrlerge zańsyz keńeıtken, mınıstrliktiń memlekettik satyp alýlar josparyn ózgertken jáne atalǵan dırektsııadan «Memlekettik satyp alýlar» týraly zańnyń normalaryn qoldanbaı satyp alynatyn qyzmetterdiń tizimin bekitken», - dedi ol.

M.Jumanbaıdyń sózine qaraǵanda, «Panasonık» teledıdary naqty baǵasy 6 mln. teńge bola tura, 11 mln. teńgege, al naqty baǵasy 22 myń teńgelik lazerlik prınter 48 myń, sondaı-aq 262,6 myń teńgeniń uıymdastyrý tehnıkasy 363,7 myń teńgeden satyp alynǵan.