Qarjy polıtsııasy zańdy tulǵalardyń aqshany qolma qolǵa aınaldyrýyn zańmen tyıym salýdy usynady

Bul týraly búgin Parlament Senatynda   «Qylmystardyń aldyn alý jáne quqyq buzýshylyqtar profılaktıkasy: qazirgi jaı-kúıi jáne jetildirý perspektıvalary» taqyrybyna arnalǵan konferentsııa barysynda Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Marat Ahmetjanov málim etti.

«Bizdiń oıymyzsha, sybaılas jemqorlyqtyń taralýyna aıtarlyqtaı jaǵdaı jasaıtyn jáıttyń biri aqshalardy qolma qolǵa aınaldyrýdyń sheksiz múmkindikteri bolyp tabylady. Máselen, Ulttyq banktiń derekterine sáıkes,  aǵymdaǵy jyldyń birinshi jartyjyldyǵynyń ózinde Qazaqstanda 968 mıllıard teńge qolma qol aqshalarǵa aınaldyrylǵan. Onyń ústine bundaı kórsetkish aı saıyn ósý ústinde. Bul rette kópshilik qaýym munshalyqty iri mólsherdegi qolma qol aqsha qarajattarynyń «otkat» úshin paıdalanylatynyn, salyq pen bıýdjettik basqa da tólemderden jaltarýǵa múmkindik beretinin biledi», - deıdi M.Ahmetjanov. Bul rette Qarjy polıtsııasy basshysynyń orynbasary sheteldik tájirıbelerdi de alǵa tartty. Máselen, Ýkraınada barlyq zańdy tulǵalarǵa satyp alýlar men tólemderdi qolma qol aqsha qarajatynsyz júzege asyrý mindettelgen.