Qarjy polıtsııasy Ulttyq bankte tekserý júrgizip jatyr
ASTANA. QazAqparat - Ulttyq bank taǵy daýǵa qalǵaly tur. Sebebi, 2013 jyly shyǵarylǵan metall aqshalardy arzan temirden jasatypty, dep habarlaıdy KTK telearnasy.
Buǵan deıin usaq tıyndardyń quramyna mys qosylsa, endi onyń bolattan daıyndalǵany anyqtalyp otyr. Bıýdjettiń mıllıardtary jumsalǵan monetalarǵa qatysty derekti qarjy polıtsııasy tekserýde,
Talaı jyldan beri túrli moneta jınaýmen aınalysyp júrgen qaraǵandylyq Sergeı Perhalskıı elimizde shyǵatyn ár tıynnyń salmaǵyn da, sapasyn da jaqsy biledi. Ulttyq Banktiń quıtyrqy áreketin bul joly mine, mynadaı tásilmen baıqaǵan. Ádette eshteńge tartylmaıtyn 1, 5,10, jáne 20 teńgelik monetalar aıaq astynan magnıtke jabysqaq bola qalǵan.
- Mundaı jaǵdaıdy 2013-shi jylǵy úlgidegi nomınaldardan baıqadym. Mysaly, mynadaı 1 tıyndyqtar buryn magnıtke jabyspaıtyn. Syńǵyrlap daýysy da bólek edi. Syrtynan qarasańyz, túri baıaǵysha. Al, quramy múldem ózgergeni baıqalyp tur»,-deıdi nýmızmat Sergeı Perhalskıı.
Bul temir aqshalar Óskemendegi teńge saraıynan shyqqan. Jańa valıýtany basyp qana qoımaıdy, kózin joıatyn da osy jer. Ulttyq banktiń tapsyrysy boıynsha buǵan deıin mys pen kúmis sııaqty metall qospalarynan jasalyp kelgen tıyndardyń quramyn aıaqasty ózgertip jibergen. Byltyr 4 birdeı tómengi nomınal:1,5,10 jáne 20 teńge, bolattan quıylypty. Bul metall tot baspasa da, qatty ystyqta tez balqıdy, ıilmese de tez synǵysh keledi. Al, Ulttyq bank bolsa tıyn quramynyń ózgergenin rastaǵanymen, ony qarapaıym qoldanýshynyń bilýi «mindetti emes» dep otyr.
«Jańadan shyǵyp jatqan monetalardyń ózegi bolattan, syrty nıkel jáne mystan qaptalǵandyqtan ol magnıtke tartylady. Ol joǵary tehnologııany qoldanyp, jasalǵan sapaly monetalardyń biri. Sondyqtan, odan qorqyp «qoldan jasalǵan jasandy moneta» dep oılaýdyń keregi joq»,-deıdi QR Ulttyq bankiniń qolma-qol aqshamen jumys isteý departamentiniń bas mamany Saparbek Úmbetov.
Biraq buǵan kúmandanǵan qarjy polıtsııasy Ulttyq bankte tekserý júrgizip jatyr. Tipti, tıyndardyń qansha tırajben shyǵarylǵany, qansha qarjy jumsalǵanyn búge-shigesine deıin anyqtamaq. Sebebi maıda tıyndar eshqandaı resmı qaýlysyz aınalymǵa engizilgen.
-Sondaı-aq, bank 999 synamalyq altynnan quıylǵan ınvestıtsııalyq monetalarǵa da arzan tústi metall qoldanǵan. Tipti, keıbiri fabrıkadan daqpen, sapasyz shyqqan. Soǵan qaramastan, olar jurtqa qymbat baǵamen satylypty. Eger qarjy polıtsııasynyń tekserisi osy bylyqty áshkerelese, Ulttyq banktiń laýazymdy tulǵalary jaýapqa tartylýy múmkin.
