Qarjy polıtsııasy organdarynan 57 basshy qyzmetker jumystan bosatyldy
ASTANA. 4 shilde. QazAqparat - Qarjy polıtsııasy organdarynyń basshylyq quramy 85 paıyzǵa jańartyldy. Bul týraly Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
Onyń aıtýynsha, 21 mamyrdan 19 maýsymǵa deıin qarjy polıtsııasynyń 68 qyzmetkeri, olardyń qatarynda agenttik tóraǵasynyń orynbasarlary, apparat jetekshisi, ortalyq apparat departamentteriniń bastyqtary, qarjy polıtsııasy akademııasynyń bastyǵy attestatsııalyq synaq tapsyrdy. Onyń ishinde 20 qyzmetker attestatsııalyq synaq talaptarynan óte almaı qaldy. 9 qyzmetker attestatsııalaýdan ótýden bas tartyp, laýazymdarynan bosatý jóninde ótinish jazdy.
M. Jumanbaıdyń atap ótkenindeı, synaqtan qulaǵandardyń qatarynda qarjy polıtsııasynyń aýmaqtyq departamentteriniń bastyqtary, departament bastyqtarynyń orynbasarlary bar.
«Sonymen birge aǵymdaǵy jyldyń basynan kezekten tys attestattaý bastalmas buryn tapsyrylǵan jumysty tıisti deńgeıde uıymdastyrmaǵandary úshin 37 basshy qyzmetker laýazymdarynan bosatylǵan. Olardyń qatarynda agenttik tóraǵasynyń 2 orynbasary, ortalyq apparat departamentteriniń bastyqtary, aýmaqtyq departamentterdiń bastyqtary men olardyń orynbasarlary bar. Talapqa sáıkes kelmeýine baılanysty qyzmetinen bosatylǵan atalǵan 37 qyzmetkerdi jáne attestatsııalaýdan óte almaǵan qyzmetkerlerdi birge sanaǵanda qarjy polıtsııasy organdarynan 57 basshy jumystan bosatyldy», - dedi M. Jumabaı.
Resmı ókildiń sózine qaraǵanda, bosatylǵan oryndarǵa áli qyzmetkerler taǵaıyndalǵan joq. Olardy taǵaıyndaý barysynda ortalyq attestatsııalyq komıssııa tartylady.
Eske sala keteıik, attestatsııalyq synaqtardy tapsyrýdyń eń tómen deńgeıi 70 paıyzdy quraıdy. Kelesi attestattaý shilde aıynda ótedi. Onda 530 qyzmetker synaq tapsyratyn bolady.
