Qarjy polıtsııasy men prokýratýra birlesip, «Alıansqurylysınvest» JShS dırektory Rınat Naımanovqa qoldanylǵan jazany ózgertý máselesin qarastyrýda
Bul jóninde búgin jýrnalıstermen bolǵan aptalyq brıfıngte Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı aıtty, dep habarlaıdy QazAqparat.
Esterińizge sala keteıik, qazannyń 18-i kúni R.Naımanovqa «Lesnaıa polıana» turǵyn úı kesheni úleskerleriniń 3,462 mıllıard teńge kólemindegi qarjysyn jymqyrdy degen aıyp taǵylyp, ony tutqyndaý jóninde sottyń sheshimi shyqqan. «Al qarasha aıynyń 9-y kúni Astana qalasynyń qurylys salýshylary qaýymdastyǵynyń ókilderi R.Naımanovtyń jazasyn ózgertip, ony úıqamaqqa alý jóninde ótinish túsken. Qaýymdastyq ókilderi ótinishterinde aıyptalýshynyń eshqaıda ketpeıtindigine ózderi kepil bolatyndyǵyn málimdegen. Osyǵan baılanysty biz atalmysh azamat jaýapty qurylys nysandarynyń jumysyn ýaqytynda aıaqtap, úleskerlerdiń páterlerin tezirek paıdalanýǵa berilýin qamtamasyz etý maqsatynda bul usynysty qaraǵan jón dep taptyq», dedi resmı ókil.
