Qarjy polıtsııasy memleketke 21 mlrd. teńgeden astam zııan keltirgen 31 kásiporynǵa qatysty is qozǵady
ASTANA. 23 qazan. QazAqparat - Elordada jalǵan kásipkerlik qurý faktileri kóptep taralýda. Bul týraly búgin Astana qalalyq qarjy polıtsııasy departamenti Kóleńkeli ekonomıka salasyndaǵy qylmystardy ashý basqarmasynyń bastyǵy Baqytjan Baıhanov málim etti.
«Sońǵy jyldary Astana qalasynda jalǵan kásipkerlik qurý faktileri kópten taralǵan. Bul qylmys túrin jasaǵan qylmyskerler úshin jazalaý merzimi 10 jylǵa deıin bas bostandyǵynan aıyrý jáne múlkin tárkileý kózdelgen» - dedi ol.
Basqarma basshysynyń atap ótýinshe, jalǵan kásipkerlik memleketke aıtarlyqtaı zııan keltire otyryp, jalǵan kásiporyndardy qurý jáne kommertsııalyq mekemeler men kontragentterdi salyq tóleýden jaltarý arqyly jasalady.
«Aǵymdaǵy jyldyń 9 aı ishinde osy faktiler boıynsha Qarjy polıtsııasy departamentiniń qyzmetkerlerimen 31 qylmystyq is qozǵaldy, memleketke keltirilgen zııannyń mólsheri 21 mıllıard teńgeden asyp túsedi», - dedi B.Baıhanov.
Máselen, onyń sózine qaraǵanda, aqsha máselesin sheship alý maqsatynda «A-STEN» JShS atty jalǵan kásipkerligin qurǵan Babkenovqa qatysty qozǵalǵan qylmystyq is sotqa joldandy. Tólenbegen salyq túrindegi zııannyń kólemi 74,3 mıllıon teńgeni quraıdy.
