Qarjy polıtsııasy laýazymdy tulǵalardyń kásipkerlik qyzmetke zańsyz qatysý faktilerin anyqtady
ASTANA. 27 tamyz. QazAqparat - Jyl basynan bastap qarjy polıtsııasy organdary laýazymdy tulǵalardyń kásipkerlik qyzmetke zańsyz qatysýynyń 6 faktisin anyqtady.
Bul týraly Qarjy polıtsııasynyń baspasóz qyzmetinen habarlandy.
Memlekettik organdardyń laýazymdy tulǵalarynyń kommertsııalyq uıymdy qurý nemese osyndaı uıymdy ózi nemese senimdi tulǵa arqyly basqarý, eger bul áreketter jeńildikter, artyqshylyqtar berý, qamqorshylyq kórsetýmen baılanysty bolsa, bul sybaılas jemqorlyq qylmys bolyp tabylady jáne ol úshin eń aýyr jaza retinde 4 jylǵa deıin bas bostandyǵynan aıyrý kózdelgen.
Aǵymdaǵy jylǵy 14 tamyzda Atyraý oblysynyń qarjy polıtsııasy Atyraý qalalyq Qurylys bóliminiń bastyǵy S. Sádýaqasovqa qatysty qylmystyq is qozǵady. Ol 2009 jylǵy aqpanda qyzmettik ýákilettigin teris paıdalanyp, senimdi adamy - óziniń týysy arqyly «Atyraý Qurman» Qurylys JShS basqarýǵa qatysqan, sonymen birge osy kásiporynnyń dırektory K. Álimovke memlekettik qurylys saraptamasymen bekitilgen joba-smetalyq qujattamasyz salynyp jatqan kommýnaldyq turǵyn úıge mansardalyq qabatty salýǵa zańsyz ruqsat bergen dep kúdiktelýde.
Budan basqa, ol Atyraý qalasyndaǵy nesıelik turǵyn úıdiń qurylysyna bólingen 11 mln.teńgeni urlady dep aıyptalýda.
17 tamyzda Sádýaqasov sot sanktsııasymen qamaýǵa alyndy.
16 tamyzda Pavlodar oblysy Tótenshe jaǵdaılar departamentiniń basqarma bastyǵy R. Ǵıbadýlınge qatysty qylmystyq is qozǵaldy. Ol «Energoprıborsersvıs» JShS basshylaryna kásipkerlik qyzmetti damytý, túsken tabysty retteý jáne eńbekaqynyń mólsherin anyqtaý boıynsha nusqaýlar berý arqyly osy kásiporyndy basqarýǵa tikeleı qatysqan dep aıyptalýda.
Budan buryn Ǵıbadýlın aǵymdaǵy jylǵy maýsymda tenderde jeńimpaz atanýǵa járdemdesý úshin 4 mln. teńge para alýǵa oqtalý aıyby boıynsha qamaýǵa alynǵan bolatyn.
Qylmystyq ister tergelýde, nátıjeleri jurtshylyqqa jetkiziletin bolady.
