Qarjy polıtsııasy qyzmetkerleri memlekettik tilden saıysqa tústi
ASTANA. Qyrkúıektiń 13-i. QazAqparat - QR Konstıtýtsııasynyń negizinde Memlekettik til mártebesin alǵan ana tilimiz - qazaq tiliniń dárejesin kóterip, ony ári qaraı damytý maqsatynda Qazaqstan halqynyń tilderi merekesine oraı Qazaqstan Respýblıkasy Ekonomıkalyq qylmysqa jáne sybaılas jemqorlyqqa qarsy kúres agenttigi (qarjy polıtsııasy)
jyl saıyn Ortalyq apparat pen aýmaqtyq qarjy polıtsııasy organdarynyń qyzmetkerleri arasynda saıys uıymdastyryp keledi. Aǵymdaǵy jyly irikteý kezeńi - Shymkent, Atyraý, Petropavl, Almaty qalalary boıynsha qarjy polıtsııasy departamentteri bazasynda jáne Qarjy polıtsııasy akademııasynda ótti. Bul týraly vedomstvonyń baspasóz qyzmeti habarlady.
Qyrkúıektiń 11-i kúni Qarjy polıtsııasy akademııasynda Astana qalasy, Aqmola, Qaraǵandy oblystary boıynsha departamentteri jáne Qarjy polıtsııasy akademııasynyń bilikti qyzmetkerlerinen jasaqtalǵan komandalar kásibı sheberlik, tapqyrlyq jáne beıneni somdaý boıynsha jarysqa tústi. Saıysqa qatysýshylar men kórermenderdi Qarjy polıtsııasy akademııasynyń bastyǵy, qarjy polıtsııasynyń polkovnıgi, zań ǵylymdarynyń doktory, professor Marat Bashımov quttyqtady.
Saıys úsh kezeń boıynsha ótkizildi, birinshi kezeń - Ortalyq apparat ázirlegen qarjy polıtsııasy organdary qyzmetiniń zańnamalyq bazasyn bilýge arnalǵan suraq-jaýap saıysy. Ekinshi kezeńde árbir qatysýshy qarjy polıtsııasy organdaryna tán qandaı da bir tergeý is-áreketi boıynsha hattamalar toltyrdy. Úshinshi kezeń - úı tapsyrmasy, qylmysty jáne qolma qol ustaý, ıaǵnı qarjy polıtsııasynyń is júzindegi jumysyn kórsetý boldy.
Saıys qorytyndysy boıynsha 1-oryndy Aqmola oblysy boıynsha departamenti, 2-oryndy - Astana qalasy boıynsha departamenti, 3-oryndy - Qarjy polıtsııasy akademııasy, 4-oryndy - Qaraǵandy oblysy boıynsha departamenti ıelendi.
Jeke atalym boıynsha «Eń tapqyr qyzmetker» atalymynda Qarjy polıtsııasy akademııasynyń doktoranty, qarjy polıtsııasynyń aǵa leıtenanty M.Bodyqova, «Hattamany úzdik ázirleýshi» atalymyn Astana qalasy boıynsha departamentiniń ınspektory N.Shotaev, «Beıneni úzdik somdaýshy» atalymyn Qaraǵandy oblysy boıynsha departamentiniń tergeýshisi, qarjy polıtsııasynyń aǵa leıtenanty A.Qasymova jeńip aldy.
