Qarjy polıtsııasy qyzmetkerleri arasynda memlekettik til boıynsha shyǵarmashylyq saıys ótti

ASTANA. 9 shilde. QazAqparat - Astana kúni merekesi aıasynda jáne memlekettik tildi damytý mindetine oraı Qarjy polıtsııasy agenttiginde jumys isteıtin ózge ult ókilderinen turatyn qyzmetkerler arasynda shyǵarmashylyq saıys ótkizildi. Bul týraly agenttiktiń baspasóz qyzmetinen habarlandy.

Shyǵarmashylyq saıystyń jeńimpazdaryn anyqtaý barysynda saıysqa qatysqan qyzmetkerlerdiń jazǵan shyǵarmalary ǵana qaralyp qoımaı, atalmysh qyzmetkerlerdiń 2013 jylǵy qańtardan bastap qazirgi ýaqytqa deıingi kezeńde memlekettik tilde ázirlegen qujattaryna taldaý jasaldy.

Nátıjesinde, Agenttiktiń Sybaılas jemqorlyq týraly isterdi ashý jáne onyń aldyn alý departamentiniń ınspektory Ilıa Skýb - 1 oryndy, Uıymdastyrý-baqylaý departamenti-ınspektsııasy kezekshi bóliminiń asa mańyzdy ister jónindegi aǵa ınspektory Denıs Vodılov - 2 oryndy, Arnaıy departamenttiń asa mańyzdy ister jónindegi aǵa ınspektory Roman Lagýtın men Ekonomıkalyq jáne qarjylyq qylmystardy ashý departamentiniń ınspektory Leonıd Kım - 3 oryndy ıelendi. Saıysqa qatysýshylar shyǵarma jazýda júldeli oryndarǵa ıe bolǵany, memlekettik tilde qujat aınalymyn arttyrýǵa qosqan úlesi úshin Agenttik Tóraǵasynyń gramotalarymen marapattalady.