Qarjy polıtsııasy qylmystyń jasalǵanyn kútpeı, onyń aldyn alýǵa kiristi
ASTANA. 2 qazan. QazAqparat - Elimizde sybaılas jemqorlyq, ekonomıkalyq jáne qarjylyq qylmystardyń sany kóbeıýde. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
«Jalpy Qarjy polıtsııasy byltyrdan bastap óziniń jumysyndaǵy ólshemderdi qaıta qarady. Bul turǵyda sandyq kórsetkishke emes, sapalyq kórsetkishke basty nazardy aýdarǵan bolatynbyz. Onyń sebebine toqtalsaq, sońǵy jyldardaǵy statıstıkaǵa qaraıtyn bolsaq, jyl saıyn qarjy polıtsııasy organdarymen qozǵalǵan qylmystardyń sany artýda. Barlyq baǵyttar boıynsha, ıaǵnı, sybaılas jemqorlyq, ekonomıkalyq jáne qarjylyq qylmystardyń sany kóbeıýde. Biraq bul túpkilikti máseleni sheshpedi. Sebebi qylmystar sanynyń artýy krımınagendik ahýaldyń jaqsarýyna eshqandaı da septigin tıgizip otyrǵan joq», - dedi resmı ókil.
«Sondyqtan da biz jumys baǵytyn profılaktıǵa, ıaǵnı, qylmystardyń aldyn alý, zańsyzdyqqa jol bermeý jaǵyna burdyq. Osy oraıda qylmystyń jasalǵandyǵyn kútýdiń ornyna, onyń boldyrmaýǵa bar kúshimizdi salamyz. Atap aıtqanda bıýdjettik qarajattyń urlanbaýyn basty nazarda ustaımyz», - dedi M. Jumanbaı.
