Qarjy polıtsııasy QR Joǵarǵy sotynyń birqatar sýdıalaryna qatysty olardyń sybaılas jemqorlyq qylmysqa barǵandyǵy týraly faktilerdi jarııa etti

Atap aıtqanda, bul týraly QR Parlament Senatynyń jalpy otyrysynda birqatar sýdıalardy QR Joǵarǵy sotynyń sýdıasy qyzmetinen bosatý týraly máseleni qaraý barysynda Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Qaırat Qojamjarov málimdedi.

«Qarjy polıtsııasy agenttigi zań erejeleri sheńberinde QR Bas prokýrorynyń sanktsııasyn ala otyryp, QR Joǵarǵy sotynyń birqatar laýazymdy tulǵalaryna qatysty arnaıy jedel sharalardy júzege asyrdy. Sonyń nátıjesinde QR Joǵarǵy sotynyń Azamattyq jáne ákimshilik ister jónindegi qadaǵalaý alqasynyń tóraıymy Almaz Táshenovanyń jáne QR Joǵarǵy sotynyń sýdıasy Saılaýbek Jákishevtiń áreketterinen sybaılas jemqorlyq qylmys faktileri anyqtaldy. Atap aıtqanda, olar ózderiniń qyzmettik ókilettikterin paıdalana otyryp, «Fıkalen» AQ múddesi úshin memleketke 212 mln. teńge shyǵyn keltiretin sheshim shyǵaryp, zańsyz syıaqylar alǵan. Jedel óńdeý materıaldary boıynsha Bas prokýratýramen sýdıalar Almaz Táshenova jáne Saılaýbek Jákishevke qatysty qylmystyq is qozǵaldy. Budan bólek QR Joǵarǵy sotynyń sýdıalary Baqytjan Jaqypov, Márzııa Baltabaı, Maqsat Ábilqaıyr jáne Marklen Qamnazarovtarǵa qatysty sybaılas jemqorlyq quqyq buzýshylyqtar anyqtalǵan. Olar birneshe márte azamattardyń quqyqtaryn buza otyryp, jeke tulǵalardyń paıdasy úshin sheshim shyǵarǵandyǵy, sot protsesine qatysýshylarmen jáne olardyń ókilderimen protsesýaldan tys baılanystarǵa barǵandyǵy, tergeý organdarynyń jumysyna kedergi keltirgendigi, sondaı-aq jalǵan kásipkerliktiń múddesi úshin azamattyq ister boıynsha sot sheshimin shyǵarǵandyǵy anyqtaldy. Budan bólek Qarjy polıtsııasy QR Joǵarǵy sotynyń Qylmystyq ister jónindegi sot qadaǵalaý alqasy hatshysynyń orynbasary T.Sársenovke qatysty qylmystyq is qozǵady. Ol «Gaz-Sınegore» JShS basshysynan sottyń ońtaıly sheshim shyǵarýy úshin 150 myń dollar para talap etken. Sársenovke aıyp taǵylyp, ol qamaýǵa alyndy. Sondyqtan da «Sot júıesi jáne sýdıa mártebesi týraly» Konstıtýtsııalyq zańda, sýdıa etıkasy týraly kodekste jáne sybaılas jemqorlyqqa qarsy kúres týraly zańda kórsetilgen qylmystyq jáne quqyq buzýshylyqtar jibergeni úshin atalǵan sýdıalardy qyzmetinen bosatý, ókilettikterinen aıyrý týraly Memleket basshysynyń atyna usynys jasalǵan bolatyn»,-dedi Q. Qojamjarov.