Qarjy polıtsııasy Kedendik baqylaý komıteti tóraǵasynyń burynǵy orynbasaryna qatysty qozǵalǵan qylmystyq isti Astana sotyna joldady
ASTANA. 23 mamyr. QazAqparat - Qarjy polıtsııasy agenttigi Kedendik baqylaý komıteti tóraǵasynyń burynǵy orynbasaryna qatysty qozǵalǵan qylmystyq isti aıaqtady,
dep habarlaıdy atalmysh vedomostvonyń baspasóz qyzmeti.
Eske sala ketsek, Qarjy polıtsııasy agenttigi 2012 jyldyń 12 maýsymynda QR Qarjy mınıstrligi Kedendik baqylaý komıtetiniń laýazymdy tulǵalarynyń ústinen, 2009-2011 jyldarǵa arnalǵan «Esirtkige áýestilikpen jáne esirtki bıznesimen kúres» memlekettik baǵdarlamasynyń sheńberinde Mańǵystaý oblysyndaǵy «Tájen» kedendik beketine qurylǵylardy memlekettik satyp alý kelisimderi negizinde atqarylǵan jumystarǵa tóleý barysynda qyzmettik quziretin asyra paıdalanǵandyqtary úshin qylmystyq is qozǵaǵan bolatyn.
Tergeý barysynda bul qylmysqa Kedendik baqylaý komıteti tóraǵasynyń burynǵy orynbasary A. Kochýbeıdiń qatysy bar ekeni anyqtalǵan.
Oǵan laýazymdy qyzmetti atqara otyryp, «Tájen» kedendik beketine kedendik baqylaý tehnıkalyq qurylǵylardy jetkizý jáne ornatý boıynsha merdigerge zańsyz qyzmet aqysyn aýdardy degen aıyp taǵyldy. Al qural-jabdyqtar ornatylmaǵan. Saldarynan 2009-2011 jyldarǵa arnalǵan «Esirtkige áýestilikpen jáne esirtki bıznesimen kúres» memlekettik baǵdarlamasynyń «Tájen» kedendik beketin qurylǵymen qamtý mindeti júzege aspaı, memleketke 580 mln. teńge kóleminde zalal keltirilgen.
Bıylǵy jyldyń sáýirinde atalmysh qylmystyq isti tergeý jumystary aıaqtalyp, Astana qalasynyń №2 Saryarqa sotynyń qaraýyna joldandy.
