Qarjy polıtsııasy: Bilim jáne ǵylym mınıstrligindegi qarjy jymqyrýdyń jańa faktileri anyqtaldy
ASTANA. QazAqparat - Aǵymdaǵy jylǵy 23-27 qańtarda QR Bilim jáne ǵylym mınıstrliginiń laýazymdy tulǵalaryna qatysty 2012 jyly Aqtóbe, Atyraý, Taldyqorǵan jáne Shymkent qalalarynda balalar-jastar qozǵalysyn damytýǵa bólingen 26 mln. teńgege jýyq bıýdjet qarajatyn ysyrap etý faktisi boıynsha taǵy 3 qylmystyq is qozǵaldy.
Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlady.
Esterińizge sala keteıik, 2013 jylǵy qyrkúıek-qazan aılarynda Astana qalalyq qarjy polıtsııasy departamenti QR Bilim jáne ǵylym mınıstrliginiń laýazymdy tulǵalaryna qatysty Shyǵys Qazaqstan, Almaty oblystarynda jáne Almaty qalasynda balalar men jastar qozǵalysyn damytýǵa bólingen 33 mln. teńgeni urlaý faktisi boıynsha qylmystyq is qozǵaǵandyǵyn habarlaǵan bolatyn.
Vedomstvonyń atap ótýinshe, osylaısha, atalǵan qylmystarmen QR Bilim jáne ǵylym mınıstrligine keltirilgen zalal mólsheri 59 mln. teńgeni qurady. Qylmystyq ister tergelýde, nátıjeleri jurtshylyqqa jetkiziletin bolady.
