Qarjy polıtsııasy Bilim jáne ǵylym mınıstrliginde iri kólemde bıýdjet qarajatyn urlaý faktilerin anyqtady
ASTANA. 14 qarasha. QazAqparat - 18 qyrkúıekte Astana qalasy boıynsha Qarjy polıtsııasy departamenti Qazaqstan Respýblıkasy Bilim jáne ǵylym mınıstrliginiń laýazymdy tulǵalaryna qatysty 2012 jyly Shyǵys-Qazaqstan oblysynda balalar-jastar qozǵalysyn damytýǵa bólingen 10 mln.teńgege jýyq bıýdjet qarajatyn urlaý faktisi boıynsha qylmystyq is qozǵady.
Bul týraly QR Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlady.
Bıýdjet qarajaty atqarylmaǵan jumystardy qabyldaý aktilerine qol qoıyp, aqshalaı qarajatty «Zamanaýı áleýmettik tehnologııalar» qoǵamdyq qoryna aýdarý arqyly urlanǵan.
2013 jylǵy 4 qarashada QR Bilim jáne ǵylym mınıstrliginiń laýazymdy tulǵalaryna qatysty 10 mln.teńgege jýyq memleket qarajatyn urlaý faktisi boıynsha taǵy bir qylmystyq is qozǵaldy.
Aqshalaı qarajat 2012 jyly Almaty qalasynda balalar-jastar qozǵalysyn damytýǵa baǵyttalǵan is-sharalardy ótkizý jumystarynyń jalǵan aktilerin paıdalaný jolymen urlanǵan.
Sonymen qatar 2012 jyly Almaty oblysynda balalar-jastar qozǵalysyn damytýǵa bólingen 14 mln.teńge bıýdjet qarajatyn urlaý faktisi anyqtaldy.
Bul derek boıynsha 2013 jylǵy 6 qarashada QR Bilim jáne ǵylym mınıstrliginiń laýazymdy tulǵalaryna qatysty qylmystyq is qozǵaldy. Olarǵa atalǵan bıýdjet qarajatyn atqarylǵan jumystardyń jalǵan aktilerine qol qoıý arqyly urlady degen kúdik taǵylýda.
Odan bólek Qarjy polıtsııasy QR Bilim jáne ǵylym mınıstrliginiń Ǵylym komıtetiniń «Bıotehnologııalardyń ulttyq ortalyǵy» sharýashylyq júrgizý quqyǵyndaǵy respýblıkalyq memlekettik kásiporynynyń esep-shottarynan 169 mln.teńgeniń urlanýyn anyqtady.
2013 jylǵy 27 qyrkúıekte atalǵan qarajat bank-klıent júıesin paıdalaný arqyly «Bioengineering group» jáne «Shýkýr» JShS-niń shottaryna qural-jabdyqqa tólem retinde zańsyz aýdarylǵan.
Bul fakt boıynsha 1 qazanda Astana qalasy boıynsha Qarjy polıtsııasy departamenti qylmystyq is qozǵady.
Búgingi kúni atalǵan qylmystardy jasaýǵa qatysy bar laýazymdy tulǵalar anyqtalýda.
