Qarjy polıtsııasy bankterden alýǵa bolatyn qolma-qol qarajattyń kólemin shekteýdi usynýda
ASTANA. 10 qyrkúıek. QazAqparat - Qarjy polıtsııasy jalǵan kásipkerliktiń jolyn kesý maqsatynda ekinshi deńgeıli bankterden alýǵa bolatyn qolma-qol qarajattyń kólemin shekteýdi usyndy. Bul týraly búgin Ekonomıkalyq qylmysqa jáne sybaılas jemqorlyqqa qarsy agenttiginiń sybaılas jemqorlyqqa jáne kóleńkeli ekonomıkaǵa qarsy qoǵamdyq keńesiniń otyrysynda Ekonomıkalyq jáne qarjylyq qylmystar departamentiniń bastyǵy Janat Elımanov málim etti.
Agenttiktiń statıstıkasyna sáıkes, Qazaqstanda "kóleńkeli" ekonomıkanyń kólemi kem degende JIÓ-niń 20 paıyzyna teń. Bul shamamen jylyna 5 trln. teńge. Sonyń eń qomaqty bóligin jalǵan kásipkerlik alady.
"Osy oraıda, Agenttik bankterden alýǵa bolatyn qolma-qol qarajattyń kólemin zańdyq turǵyda shekteýdi usynýda. Bul jalǵan kásipkerliktiń damýyna qajetti barlyq jaǵdaılardy túp-tamyrymen joıady. Qazirgi ýaqytta bizdiń elde kez kelgen taýar men qyzmetti qolma-qol aqshasyz da alýǵa bolatyndyqtan, eshkimge kedergi bolmaıdy. Mundaı shekteý, kerisinshe, elde salyq túsimin arttyryp, jemqorlyqty azaıtady, paraqorlyq pen bıýdjettik qarjyny jymqyrýdyń negizine nuqsan keledi", - dep atap ótti ol.
